top of page

41 le aofa’i o ali’i ta’aalo o le ‘a filifilia ai le ‘au a le Manumā.


Tūsia e Lauano Demetrius Ah Mau.


O lea ua fa’asalalau fa’alauaitele nei le lisi o ali’i ta’aalo e 41 o le 'a fa’agasolo ai toleniga mo le ‘au a le Manuma o le ta’amilosaga o le World Rugby Pacific Challenge, lea e faia mai i eleele o Samoa nei.


E 41 i latou ua filifilia i le lisi o le au toleni ma o i latou uma o lo’o iai suafa i le lisi lenei sa mafai ona filifilia mai i kalapu lakapi ese'ese i totonu o Samoa nei, a’o fa’atino ta’amilosaga lakapi fa’aitumalo e pei ona iai le ta’amilosaga 15 a le Iuni Lakapi a Apia, Faleta, Lotofaga faapea ai ma ma le motu tele i Savaii.


O lo’o iai fo’i ma nisi o ali’i ta’aalo o le Junior Manu Samoa lea e le’i leva ona ma’ea mai le ta’amilosaga sa auai atu ai i Niu Sila i le vaiaso ua te’a, ma o lo’o filifilia ai fo’i ma nisi o tama ta’aalo mai i kalapu i atunu’u i fafo e pei ona iai kalapu mai Niu Sila.



E le umi se taimi o le a galulue ai le pulega atoa o le Manuma i le tu’ufatasia o tama ta’aalo ma faatino a latou toleniga pe a fua iai i le aso e amata ai ta’aloga lea e fa’atulaga mai ai le ta’aloga muamua a le Manuma ma le ‘au a Japan xv i le aso 10 o Aperila i le 4 le afiafi, ma o le a faia lenei ta’aloga i le malae ta’aalo i le Apia Park.


O le vaiaso nei o le a amata fa’agasolo ai loa toleniga mo i latou uma ua filifilia aemaise ai o le fa’atalitali mo le auai mai o i latou o lo’o malaga mai i Niu Sila.

57 views

Comments


bottom of page