top of page

$42 miliona le Tala Fa'aaopoopo Muamua o Tupe 2023/2024 ua folasia i lenei tausaga.

Ua folasia e le Afioga i le Minista o le Matagaluega o Tupe a le atunuu le tala fa'aaopoopo o tupe 2023 i le fonotaga a le Palemene i lenei vaiaso.


O le tala fa'atatau o tupe o le tausaga fa'aletupe lenei i ana tupe fa'aopoopo na maua mai i Matagaluega ma latou galuega fa'atino o lenei kuata fa'aletausaga.


Aotelega o le saunoaga a le afioga i le Minisita o Tupe, Lautimuia Uelese Afoa Va'ai:


"TALA FA’ATATAU FA’AOPOOPO MUAMUA O LE TUPE:


Lau Afioga i le Fofoga Fetalai, O le a ou otoina atu le aotelega o lenei Tala Fa’atatau Fa’aopoopo Muamua o le Tupe 2023/2024.


TUPE MAUA FA’AOPOOPO

Lau Afioga i le Fofoga Fetalai, O le aotelega o tupe maua fa’aopoopo mo lenei Tala Fa’atatau Fa’aopoopo Muamua o le Tupe, e tusa ma le $42,542,811 ma o lo’o au’ili’iliina atu e fa’apea:


1. $23,470,760 mai i le Matagaluega o Tupe.

O nei tupe maua, o totogi o fa’aunegatupe fa’aauau faatasi ai ma le tului mai le Fa’alapotopotoga o Malosiaga Faa-eletise mo aitalafu tuua mai le tausaga fa’aletupe 2021 e oo mai ia Iuni 2023;


2. $1,000,000 mai i le Matagaluega a le Palemia ma le Kapeneta. O vaegatupe fa’aopoopo nei o le a aoina mai i le fa’atauina o tusifolau, ona o le siitia o le manaomia o tusifolau talu ai le fa’atupulaia o tagata malaga;


3. $18,072,051 mai i le Matagaluega o Tiute ma Tupe Maua. O le a siitia tupe maua mai lafoga o loo iai i le taimi nei, e pei ona fa’atinoina ai e le Matagaluega le latou iloiloga, ma sa fua lea i vaegatupe ua maea aoina mai, aemaise ai le fa’atupulaia o le tamaoaiga o le atunuu i le taimi nei.

O nei siitaga e vaevaeina fa’apea; o $4,861,417 mai Lafoga o le VAGST i oloa fa’aulufale mai (VAGST Import); o $2,965,096 mai Tiute mo oloa fa’aulufale mai (Import Duty); o $9,790,177 mai isi lafoga o oloa fa’aulufale mai (Import Excise); o $455,361 mai Lafoga o oloa gaosi i totonu o le atunuu (Domestic Excise). Tupe Fa’ameaalofa mai Paaga mo Atiina’e a le Malo.


O fa’aopoopoga nei o fesoasoani fa’ameaalofa mai a tatou Paaga mo Atiina’e a le Malo, na fa’ailoa mai ua pasia le Tala Autu o Tupe, e fuafua e fa’atupe ai nisi o polokalame ma poloketi a Matagaluega eseese. O le aofa’iga atoa o nei fesoasoani fa’ameaalofa fa’aopoopo e tusa ma le $1,025,759.


TUPE FA’ATATAUINA O LE A FETU’UNA’I

Lau Afioga i le Fofoga Fetalai, O lenei Tala Fa’atatau Fa’aopoopo Muamua o le Tupe 2023/2024, e $920,621 le aofaiga o tupe o loo fa’amoemoe e toe fetu’una’i ma e au’ili’iliina atu e fa’apea:

1. $520,621 mai i le Matagaluega o Pisinisi, Alamanuia ma Leipa.

O le toe fetuunaiga o matafaioi o le Kapeneta, e afua ai le fa’asee atu o le Vaega e Mataituina Tagata Galulue Faavaitaimi i le Matagaluega o Tupe, faapea ma nisi o le aufaigaluega o loo galulue i Niusila ma Ausetalia i le Matagaluega o le Va-i-Fafo ma Fefa’atauaiga;


2. $400,000 mai i le Matagaluega o Tupe. O nei vaegatupe ua mafai ona fa’asaoina mai i le toe fetu’una’iga o taimi e fa’atino ai nei poloketi e Matagaluega eseese a le Malo. Ona o lea tulaga, ua mafai ona fetuunai ai sao a le Malo, ma o le a ou au’ili’iliina atu e fa’apea:

• $100,000 mai i le sao a le Malo i le poloketi Fesoasoani mo le Iunivesite o Samoa mai le Malo o Iapani.

• $50,000 mai le sao a le Malo i le Atiina’e o Fela’ua’iga i luga o le Lauelele

• $150,000 mai le sao a le Malo mo le Poloketi o le Fa’aleleia o le Auala mai Apia e tau i Siumu (Cross Island Road)

• $100,000 mai i le sao a le Malo i le Vaega 2 o le Poloketi mo le Fausiaina o le Ofisa o le Fono.


TUPE ALU FA’AOPOOPO

Lau Afioga i le Fofoga Fetalai, O le aotelega o talosaga fa’aopoopo mo lenei Tala Fa’atatau Fa’aopoopo Muamua o le Tupe, e tusa ma le $27,791,151, ma o le a ou au’ili’iliina atu: Tupe Alu Fa’aletulafono: O le a fa’aopoopo tupe alu fa’aletulafono i le $24,008,831.

• E $430,245 o le a fa’aaluina i Faasologa o Totogi 1964, o vaegatupe fa’aopoopo nei mo totogi ma alauni o Minisita fou e to’alua o le Kapeneta faatasi ai ma le siitia o vaegatupe mo alauni a Komiti faapalemene ona ua faaopoopo fonotaga a Komiti eseese.

• $18,566 ua fa’atatauina i le Tulafono mo Faamasinoga 1961, mo le toe fetuunaiga o le totogi o le Peresitene o le Fa’amasinoga o Fanua ma Suafa. 7 7

• $89,260 ua faatatauina mo vaegatupe o totogi ma alauni mo ni Sui Minisita faaopoopo.

• $23,470,760 ua fa’aopoopo mo Tupe Totogi atu mai le VAGST, o lenei vaegatupe o le a totogi atu i le Fa’alapotopotoga o Malosiaga Tau Eletise (EPC) ina ia fa’amama ai vaegatupe tuua toe totogi atu (refunds) i le Fa’alapotopotoga mai ia Mati 2022 seia oo mai ia Iuni 2023. Polokalame o Tupe Alu a Matagaluega: Lau Afioga i le Fofoga Fetalai, O le aofaiga o tupe fa’aopoopo mo Polokalame fa’atinoina e Matagaluega e $2,756,561 ma e aofia ai vaega nei:


1. $263,810 mo le Matagaluega o Pisinisi, Alamanuia ma Leipa. O lenei vaegatupe e mo Galuega Faatino e lagolago ai le Minisita o Pisinisi, Alamanuia ma Leipa, talu ai le fetuunaiga o matafaioi a le Kapeneta. Ma e fa’aagaga mo totogi o tagata faigaluega fa’apea le fa’agaioiga o le Ofisa a le Minisita mo masina o totoe o le tausaga fa’aletupe.


2. $262,540 mo le Matagaluega o Aoga, Taaloga ma Aganuu. O lenei vaegatupe e mo galuega fa’atino e lagolago ai le Minista fou o Taaloga ma Alagaoa mo le Fiafiaga o Tagata e faapei ona faia foi mo le Matagaluega o Pisinisi, Alamanuia ma Leipa. O le a fa’aopoopoina lenei vaegatupe i le Galuega Faatino e lagolago ai le Minisita (ministerial support output) o loo i lalo o le tala o le tupe a le Matagaluega i le taimi nei, se’ia mautu tulafono mo le faa-tuina o le Matagaluega fou i le tausaga faaletupe 2024/25, e pei ona fuafuaina.


3. $465,588 mo le Matagaluega o Tupe. O nei vaegatupe e mo polokalame ma faiga faavae fa’aopoopo i lalo o le Matagaluega e aofai ai vaega nei: • $92,500 le vaegatupe fa’aopoopo mo le sueina o tusi mo poloketi e māe’a i le tausaga fa’aletupe nei; 8 8 • $50,000 o le sao a le Malo mo le Maliliega ma le UNFPA mo le totogiina o lafoga (VAGST) mo tupe fa’aalu a lea polokalame. • $323,088 mo le Vaega e Mataituina Tagata Galulue Fa’avaitaimi, lea ua fa’asee mai i lalo o le va’avaaiga a le Minisita o Tupe. Mo le silafia, ua fa’amaonia e le Kapeneta le Komiti Galulue (LEEP Taskforce) e mataituina le fa’atinoina o le auina atu o tagata galulue fa’avaitaimi.


4. $902,802 mo le Matagaluega o le Va-i-Fafo ma Fefa’atauaiga. O vaegatupe nei e fa’atupe ai le fa’asee atu o sooupu (liaison officers) mai le vaega e mataituina tagata galulue faavaitaimi, sa i le Matagaluega o Pisinisi, Alamanuia ma Leipa. O lenei fetuunaiga, o le a mautinoa ai le sologa lelei o le fa’afoeina o lenei polokalame, mo le vaaia lelei o tatou tamafanau o loo galulue fa’avaitaimi. O le a galulue sooupu i lalo o le vaavaaiga a Konesula i Nui Sila ma Ausetalia, ma tuuina atu a latou lipoti i le Komiti Galulue (LEEP Taskforce).


5. $746,700 mo le Matagaluega a le Palemia ma le Kapeneta. O lenei vaegatupe ua fa’aopoopo mo le fa’atauina mai o tusi folau fou mo le tausaga fa’aletupe o loo fa’agasolo nei.


6. $115,121 mo le Matagaluega o Faalapotopotoga a le Malo. Ona o le fetuunaiga a le Kapeneta, o loo fa’aaogaina faatasi ai e le Minisita o Fa’alapotopotoga a le Malo ma le Minisita o Pisinisi, Alamanuia ma Leipa vaegatupe o loo fa’atatauina i lalo o le Matagaluega o Fa’alapotopotoga a le Malo. O nei vaegatupe e toe fa’aolaina ai tupe sa fa’aaluina mo le Minisita o Pisinisi, Alamanuia ma Leipa mai le tala o le tupe a le Matagaluega e amata mai i le aso 4 Oketopa 2023 seia oo i le 31 Ianuari 2024.


POLOKALAME FA’AOPOOPO MO ATIINA’E

Lau Afioga i le Fofoga Fetalai, E tusa ma le $1,025,759 le aofa’iga o polokalame fa’aopoopo o le a fa’atupeina sa’o e Paaga masani mo Atiina’e a le Malo o Samoa e patino lea i vaega ma’oti nei:

• $435,000 mo le Vaega Ma’oti o Atina’e o Nu’u ma Afio’aga, ma le Soifuaga Manuia Lautele; • $59,705 mo le Vaega Ma’oti o Soifua Maloloina;

• $187,282 mo le Vaega Ma’oti o Tulafono ma le Amiotonu;

• $343,772 mo le Vaega Ma’oti o Fela’uaiga ma Atina’e Tetele;


E fia fa’aleo foi le fa’afetai a Samoa i le Malo o Niu Sila, i le sainia ai o se maliega i le vaiaso ua tuana’i atu, e tusa ma le $15miliona tupe Niu Sila e feasoasoani i polokalame o suiga i le tau.


O lenei fesoasoani na afua mai i le malaga asiasi a le Tamaita’i Palemia talu ai ia Ardern, i Apia i le tausaga 2022. E $1.5miliona tala Niu Sila lea ua maea ona fa’ailoa i le Tala Autu o Tupe o loo fa’agasolo nei, ma o le isi $13.5 miliona tala Niu Sila, o le a fa’aagaga ma fa’aaogaina i le tausaga fa’aletupe fou, e lagolago ai galuega a lo tatou Malo e tali atu ai i suiga o le tau ina ia mausali ma lava tapena ai lo tatou atunuu i ni aafiaga e ono tutupu mai.


E momoli ai foi le fa’afetai tele i a tatou Paaga uma, o loo fa’aauau pea ona fesoasoani mai ia Samoa, ma ana atiina’e".

285 views
bottom of page