top of page

"A'oa'o mai i le tōfā mamao." Emily Luck: Australia Day.

27 Ianuari 2023.



O le aso 26 o Ianuari 2023, e fa'amanatu ina ai e Ausetalia le aso ua fa'aigoaina o le Aso mo Ausetalia(Australia Day) i tausaga uma.


O le fa'amoemoe o lenei aso, e amana'ia ma manatua ai so'o se tagata Ausetalia i o latou sao mo le atunu'u.


O le afiafi o le Aso Lulu i Samoa 25 Ianuari 2023, lea na fa'amanatu ai i Samoa lea Aso ma o lea sa fai ai se sauniga fa'alemalo i le maota o le Komesina Maualuga o Ausetalia i Tipapata.


O se aso e manatua ai e tagata Ausetalia o latou tupu'aga ma le sao fo'i mo lea atina'eina o le atunu'u, ae na avea fo'i lea aso Fa'amanatu e toe fa'amautu ina atili ai faigapa'aga o Samoa ma Ausetalia.


O le susuga i le fa'afeagaiga ia Rev Siaosi Dr Salesulu sa faia le sauniga i le lotu, ona sosoo ai lea ma le lauga autu o le aso na saunia lea e le Komesina Maualuga o Ausetalia ia Emily Luck.


"I Ausetalia, o se faiga masani le faʻaaloalo i tua'a i aso ua mavae, o loʻo iai nei ma ni aʻoaʻoga taua, faʻaalia ma faʻamanatu a latou aganu'u ma so'otaga loloto i eleele ma vai po'o so'otaga o le tagata i le Natura."

Komesina Maualuga o Ausetalia ia Emily Luck

Na momoli le fa'afetai a le tama'ita'i Komesina Maualuga o Ausetalia i tua'a ua mavae ona o le soifua finau sa malaga mamao mai ai i atuvasa e fia i le afe o tausaga i le sa'iluiga o se manuia.


O se tasi o vaega o le lauga 'autu a H.E Emily Luck, o le amana'iaina lea o le tu ma le aganu'u a Samoa aemaise o tua'a na asaina le gasu o le taeao ua mafai ai ona maua e tagata o Samoa ma le Pasefika ni ele'ele e nonofo ma atina'e ai le atunu'u e ui ina tele o lu'itau o lo'o feagai pea i le tele o taimi.


"Ou te fa'amanatu lau aganu'u fa'a-Samoa, e maua'a i le alofa ma le fa'aaloalo, ma se tautinoga loloto e va'aia ou measina fa'anatura.


Ou te fa'aaloalo i ou tua'a ma ou tagata - i aso ua mavae, i le taimi nei ma mea ua tula'i mai - o lo latou apelepeleina o nei ele'ele ian ia tatou fa'atasi ai ma ia mafai ona mautinoa ai lona maufetuuna'i e ui o lo'o tula'i mai ni fa'amata'u ma lu'itau tele o le lalolagi nei."


Sa saunoa fo'i le tama'ita'i Komesina Maualuga o Ausetalia e fa'afeiloa'i le sui Komesina e pei ona amata ai i le lua vaiaso ua te'a e lagolago ia te ia i lana galuega o se sui o Ausetalia i Samoa nei.


"Ae tatou te lei amata, ou te fia faafeiloai atu ia Claire McGeechan ma lona aiga, Sam, Millie, Teddy ma Belle i Samoa. Na amatalia Claire e avea ma o tatou Sui Komesina fou talu ai vaiaso ua tuana'i nei"


O Ausetalia o le tasi lea o atunu'u o lo'o tumalosi i auala e fesoasoani ai i fesuia'iga ma'aleale o le tau ua a'afia ai le tele o atunu'u o le Pasefika fa'apena ma Samoa.


"Pe o le si'isi'i o le suasami ma le tele o afā masani ma ogaoga i le Pasefika, po'o le fa'atama'ia o togavao i le afi ma lologa mata'utiana 'a'afia ai Ausetalia, o le taufaamata'u o suiga o le tau ma le auala tatou te tali atu ai atonu o le a avea ma lu'itau taua mo lo tatou tupulaga."


E maualuga le agaga fa'afetai a le Malo o Ausetalia i tagata o le Pasefika ona o le mata'ituina lelei o puipuiga o gataifale ma le ele'ele, na fa'afetai ai e le Komesina le tofa a Samoa ma Atubu'u Pasefika ona o le puipuia lele o nei 'oa fa'alenatura ma o lona manatu e tatau ona fa'aauauina pea ona puipuia mo e mulimuli mai ia i tatou.


E loloto le tofa i le tama'ita'i Komesina Maualuga a Ausetalia, o lea na ia saunoa ai i le taua o le a'a'oina mai i le manatu 'TOFA MAMAO'.


"E ao ona tatou a'oa'oina mai le manatu faa-Samoa o le tōfā mamao, le poto e folau ai se lumana'i le mautinoa e ta'ita'ia e lesona o aso ua mavae."


Na pa'i le saunoaga a Emily Luck, i le taua o le so'otaga fa'apa'aga a Samoa ma Ausetalia, i le silasila ai ma le maitau a le faigamalo o Ausetalia i vaega o lo'o 'ave iai le fa'amuamua a le tatou atunu'u o lea na ia saunoa ai ua toe fuata'ina le tu'uina mai lea o a latou polokalame atina'e ina ia atagia ai mana'oga ua fa'ailoa mai e le Malo o Samoa 'aemaise lava e pei ona fa'ata'oto mai i lana fuafuaga fa'ata'atia mo le Atina'e o Samoa(Pathway for the Development of Samoa.



SO'OTAGA A SAMOA MA AUSETALIA I TA'ALOGA.

I le isi vaega o le so'otaga vavalalata o malo nei e lua, na saunoa ai le Komesina' o le tulaga lea i ta'aloga.


Na o'o le saunoaga a le Komesina i se matati'a na 'ausia e Samoa ina ua saofaga atu i le sa'iliga siamupini mo le Ipu o le Lalolagi i le ta'aloga o le Lakapi Liki i le tausaga ua mavae 2022.


"O lo'o fa'aauau pea ona avea ta'aloga ma fa'amaufa'ailoga o le so'otaga vavalalata o atunu'u e lua. E le mafai ona galo ia i tatou se vaaiga fiafia ia Samoa ma le lalolagi atoa ina ua sao atu le Toa Samoa i le faaiuga o le ta'amilosaga Lakapi Liki a le Lalolagi lea na ta'a'alo ai ma Ausetalia."


I le fa'atumauina atili ai o lenei so'otaga, o lea ua fa'ailoa ai e Ausetalia le sao o se tasi o Polokalame mo Ta'aloga o lo'o lagolagoina e Ausetalia; le polokalame e ta'ua o le PacificAus Sports Hub lea o lo'o iai lona ofisa i Samoa.


"Ua tatou iloa uma le malosi o taaloga e aumai faatasi ai tagata. I le amanaia ai o lea tulaga, o le PacificAus Sports Hub - o loʻo faʻamautu iinei i Apia - o loʻo faʻaauau pea ona tuʻuina atu avanoa mo tagata taaalo i le nei itulagi atoa e aoao, ma maua ai avanoa e fa'asikolasipi ai fanau o loo iai taleni ta'alo ina ia fa'alaua'itele ai o latou tomai i le malo o Ausetalia."


Na fa'ai'u le saunoaga a le Komesina Maualuga a Ausetalia i le agaga fa'afetai ma le fa'agae'etia i le faigapa'aga a Samoa ma Ausetalia i le tele o atina'e ma polokalame mo le lelei o atunu'u e lua.


"O lea… i le Aso o Ausetalia, e le gata ina tatou manatunatu i lo tatou fa'asinomaga o ni tagata Ausetalia, ae fa'apea foi a tatou matafaioi o ni tagatanuu o le lalolagi atoa ma sui o le aiga Pasefika.”

A o tatou vaavaai atu i le tausaga o i luma, ua fa'agaeetia au i le malosi o le tatou faiga fa'apaaga ma tagata o Samoa ma lona Malo."


Aufaigaluga a le Australia High Commission

113 views

留言


bottom of page