top of page

Amata mea Faleālupo i fa'aaliga o le Ulua'i Seleselega o le tausaga fou fa'aletupe a le mālō.

Faifaatoaga mai Faleālupo/ Ata Pueina: Ministry of Agriculture.


O le itūmālō palota o Faleālupo i Savai'i ua amata mea nei i le fa'aaliga a le 'ai faifa'atoaga, fai lafumanu ma le aufaifaiva o le Uluai Seleselega i lenei tauasaga faaletupe fou 2023/2024.


Sa faatumulia le itūmālō i lenei faamoemoe,a sa auai sui o le Matāgaluega o Faatoaga ma Faigafaiva aemaise o le Afioga i le Alii Minisitā Lagolago ia Maiava Fuimaono Tito Asafo.


O le saunoaga autū, na fofogaina e le Minisita Lagolago ma na faamanatu i le itūmālō le agaga o le mālō e ala ai ona taumafai e ave le faamuamua i faatoaga ma atinae gafataulimaina.


Ua māe'a ni isi o uluai seleselega sa iai le tausaga faaletupe tuai mai i le tausaga ua tuanai 2022/2023, ae peitai ina ua pasia le paketi fou a le mālō i le masina o Iuni; o lea ua toe faataamilo ai lenei polokalame faaauau mo aufaifaatoaga a Samoa atoa.


O lenei polokalame o se fa'amaite a le faigamālō, ina ia mafai ona maua uma e tagata fai atinae lafumanu, fai faatoaga ma au faifaiva avanoa e fa'aali ai fua o ā latou galuega ma se fa'amoemoe ina ia mafai ona iloa ai e le matāgaluega ni vaega o loo manaomia ai le fesoasoani.


O tausaga ua tuana'i, sa nao le tasi nofoaga e autovaa iai fai faatoaga ma sa le maua le tele o avanoa e ni isi o faifaatoaga mai nuu i tua.


Peitai ina ua se'ei mai le faigamālō o loo iai nei, sa silasila ai i lea faigafaavae fou ina ia maua uma ai e faifaatoaga o Samoa avanoa nei.


O le faamoemoe ma manulautī o nei faamaite, ina ia faamalosia tagata faifaatoaga e galulue, ma ia tafiesea le ola faalagolago o oloa ma mea taumafa faatau mai i isi atunuu.


O uluai seleselega e tatala lava avanoa i soo se atinae, e aofia ai faatoaga, au faifaiva, fai meataulima, lafumanu ma isi.


O le māe'a o le saunoaga autū a le mālō, sa faailoa ai ma le fesoasoani i le itūmālō e fesoasoani i taumafaiga o nei atinae.

O le fesoasoani lenei, ua mafai ona tuusao le seleni e tusa ma le $10,000 i aao o le komiti o le itūmālō ina ia pule lava latou i vaega e faaogaina ai auā lava nei atinae fa'atoaga.


O le faigafaavae lenei lea na suia mai i le uluai seleselega mulimuli o le tausaga faaletupe na tea nei, i le Itūmālō Palota o Vaisigano 2.

Comments


bottom of page