Ua fa’asalalau fa’alauaitele e le Asosi Soka a Samoa a latou polokalame mo le atina’eina o le ituaiga soka lea e taua o le Futsal, o se soka e fa’atinoina i totonu o faletaalo(Indoor Sport).
O nei polokalame ma toleniga e mo alo ma fanau uma o kalapu soka a le atunu’u e i lalo o le 16 tausaga le matutua.
O le fa’amoemoe o le asosi ia lava tapena alo ma fanau mo le ta’amilosaga soka i le masina o Me i le tausaga nei mo ali’i ma tama’ita’i e i lalo o le 16 tausaga le matutua.
O lo’o talosaga malosi mai le pulega mo kalapu soka uma o lo’o iai a latou au 16 tausaga le matutua(under16) ina ia auai atu uma mo le filifilia ai o se au lelei mo ia ta’amilosaga o lo’o loma nei i le masina o Me.
O le aso 19 o le masina lenei o Mati ua faamoemoe o le a amata fa’agasolo ai loa toleniga ma fuafuaga uma nei, ua fa’ailoa foi i se pepa o fa’amatalaga mai i le Asosi Soka a Samoa o le ‘a mafai ona pikiina mai uma i latou mo toleniga i le itula e 4 mo toleniga i le malae i Tuanaimato, a maea foi toleniga o le a toe momoli atu lava fanau e taavale a le asosi.
E tatau i pulega o kalapu soka o lo’o fia auai i nei toleniga le faamaumau uma o igoa o tama ma teine ta’aalo 16 tausaga o le a auai i toleniga ona logo lea o le pulega a le Asosi Soka a Samoa ma fa’aoo iai suafa uma o i latou o le a auai i toleniga.
Comentários