Amata va'aia ata o tauleleia i le poloketi o mailei pua'a o lo'o taulamua ai le M.A.F.

Ata: Aufaifa'ato'aga a Sapapali'i. Ata Pu'eina: M.A.F.

E le'i atoa se masina talu ona fa'alauiloa le poloketi a le Matagaluega o Fa'ato'aga ma Fiagafaiva ma le Asosi o le 'Aufaifa'ato'aga a Samoa i mailei pua'a, ae o lea ua va'aia ata o ta'ulelei i le tino mai o lenei polokalame.

O le masina ua tuana'i, na tatalaina ai i le Motu o Savai'i lea poloketi i Mailei Pua'a e fesoasoani lea i le tapu'eina o meatu'aolo 'aivao ina ia puipuia fa'ato'aga mai i le 'aina.

O le afio'aga o Sapapali'i le isi nu'u sa tuuina atu ai lenei mailei e fa'ata'ita'i ai, ma sa molimauina aoga ma le taua o lea poloketi i le 'aufaifa'ato'aga ina ua asia e le Minisita o F'ato'aga ma Faigafaiva ia La'aulialemalietoa ma le aumalaga mai i Amerika Samoa le nu'u.

I le asiasiga lenei, na molimau ai le Minisita i le tele o le aoga o nei mailei ina ua mafai ona tapu'e ai pua'a 'aivao, ma o se fiafiaga i le aufaifa'ato'aga ua amata ona tali lo latou tautiga i le tau taofiofi lea o le fa'aleagaina o ma'umaga e meatu'olo.

Ua iai le fa'amoemoe a le Minisita ma le Matagaluega e fa'asafua atu i tua i isi nu'u ma afio'aga nei poloketi taua.

O le poloketi lenei o lo'o fesoasoani mai ai le Malo o Amerika o se tasi o pa'aga totino a le tatou atunu'u aemaise o le 'aufaifa'ato'aga.