top of page

"Aua ne'i e oti ma le mea moni". Taupa’ū .





O se tagata Samoa na molimauina se tasi o faiga fa'ailoga lanu sa iai le malo o Niu Sila i le 70 Senituri le 'Dawn Raids', o ia fo'i lea na finau malosi i le fa'amasinoga tonu mo tagata Pasefika.


O le tina matua ia Taupau Makalita Edwards, ua 84 tausaga lona matua, ma ua iai nei i le la'asaga lona fa o le gasegase o le Kanesa, ua fa'asoa i fa'afitauli na feaga ma ia a'o talavou ina ua malaga atu i Niu Sila.


"Mo tagata uma, Maori ma le Pasefika, tula'i ma tautala i le mea moni". Taupa'u.


O le tausaga e 1964 na malaga ai Taupau i se va'a ma taunu'u ai i Aotearoa. Sa aumau ma fa'amautu i le ogatotonu o Aukilani i Owairaka ma lona to'alua ma le la fanau e to'afā.


I le tausaga o le 70, na tula'i mai ai se tulaga fa'aletonu i le tama'oaiga a le malo o Niu Sila, ma o ina na 'amata ona fa'ataunu'u ai ma le fuafuaga a Niu Sila e toe fa'afo'i uma lava tagata Pasefika i latou lava atunu'u po'o le fa'atino ai o ni fa'asalaga.


I lena taimi, sa ta'ua e le tina na te'ena o ia ina ia aua nei fa'aipoipo atu i se ali'i Maori.


Na fa'amatala e Taupa'ū le faigata o lea taimi i 'aiga Samoa sa nonofo ai ma le fefe. E o'o lava fo'i ia te ia sa filemu ma ona fefe ina ne'i tupu se mea ia te ia.


Mai i le silia ma le 40 tausaga, ae o lea fa'ato'a iloa e lana fanau ni tulaga ogaoga sa o'o i le latou tina.


"Na lagona lou mafatia ma ua ou leiloa se tala e fai". o le tala lea a Mesepa le tama teine a le lo'omatua o Taupau. "E leai ma se isi o matou ma ou uso ma tuagane na iloa fa'aitauli sa o'o ai si o matou tina i le taimi o fa'asalaga nei a Niu Sila".


Sa latou fesili i le latou tina, pe mafai ona fa'asoa atu le mea na tupu ia te ia ma lana faigamalaga a'o latou laiti aemaise o ni faamasinoga le tonu sa latou feagai ma isi tagata Pasefika.


I le tausaga e 1970 a'o matamata Taupau i le poloakalame a Robert Muldoon i le televise o lo'o fa'apea mai, "o Tagata Pasefika uma o le 'a toe fa'afo'i i o latou atunu'u e fa'apena i tagata Maori e fa'afo'i i le itu i matu".


Sa ia fa'alogo fo'i i le poloa'iga lava lenei e tasi i luga o le leitio ma sa fa'apea ane ai, "O ia fo'i le isi".


"I le ola ma le fefe i lena taimi, sa ou fa'apea ane ai afai ae toe fa'afo'i a'u i Samoa ma lo'u to'alua i le itu i Matu, o le a la se mea a tupu i le ma fanau e to'afa".


"O le ā sau mātau iai i le olaga fefe sa iai i lena taimi? matua ou fefe lava".


Tina matua ia Taupa'u ia ua ia fa'asoa lea tulaga mata'utia sa a'afia ai ia ma lona 'aiga.


Sa ia te ia uma ni pepa tāua ma le fa'amoemoe ia taofia ai le toe fa'afo'i sa'o mai i Samoa aepeita'i sa iai pea ona lagona fefe i lea lava taimi.


Pe 'a toe tōmanatu le tina matua ia Taupa'ū i mea na tutupu i lea tausaga, "E taua ai ia te ia lea fa'asoa i lana fanau, aua e manatu o se fuala'au aoga mo lona agaga ma lona loto".


Ina ua fa'ailoa ma fa'asalalau fa'alaua'itele lenei tala a le tina ia Taupa'ū i luga o le polokalame ua fa'aigoaina o le Teu le Va i le amataga o le tausaga, sa talanoa atu ai le tina matua i lana tama teine o Fiu Mesepa e mana'o e fa'atino se Savali Filemu e manatua ai pea lenei mea na tupu.


I le aso 30 o Setema o le tausaga nei 2023, na fa'ataunu'uina ai lenei savali ma lea fa'amoemoe, i le mamafa o timuga ae na toso lava lana nofoa fa'ata'avalevale ma ta'ita'i lenei savali filemu sa miti iai.


Ua talosagaina ai fo'i e Taupa'u le mālō ina ia tapena se 'auala talafeagai mo tagata faiatu i totonu o Aotearoa, ina ia 'aua nei toe iai se isi e nofo ma le fefe ma le popole e pei ona sa iai o ia.


Aepeita'i, e le'i lagolagoina e le Vaega Fa'aupufai a le National.


"'Aua le lagolagoina lea tulaga". O le tali a le ta'ita'i a le National ia Christopher Luxon. "E faigofie le tali, e tatou te lagolago na'o tagata faimai ua fa'atulafonoina".


E ui e te'ena e lea vaega fa'aupufai le augani a lenei tina matua, ae peitai o lana moemitiga a'o iai i le la'asaga mulimuli o lona gasegase ina ia aua nei toe tulai ni faiga fa'ailoga lanu fa'apea i tagata Pasefika ma o lana saunoaga mulimuli e fa'apea,"Aua nei e alu ma 'ave le mea moni i le tu'ugamau".


O le tausaga e 2002 na malaga mai ai le Palemia o Niu Sila i lena taimi ia Helen Clark e fa'atoese ia Samoa ona o lea tulaga ae o le tausaga e 2021 na fa'atautaia ai e le Palemia talu ai ia Jacinda Adern se ifoga i tagata Samoa i Niu Sila ona o lea lava tulaga.



4,215 views

Komentarze


bottom of page