top of page

Auai le Ao Mamalu o le Malo Samoa ma lana Masiofo i le sauniga lotu a le Victory Power Ministry


O se vaaiga fa’agae’etia na molimauina e i latou sa auai i le sauniga lotu masani i le aso Sa ananafi a le Victory Power Ministry i Manukau, le maua ai o se avanoa fa’apitoa latou te fai sauniga faatasi ai ma le Afioga ile Ao Mamalu o le Malo Tuto’atasi o Samoa le Afioga iā Tuimaleali’ifano Va’alēto’a Sualauvī II ma lana Masiofo le Afioga ile Matua iā Fa’amausili Leinafo faapea le latou aumalaga, a’o fa’aopea ai i NZ ona o nisi o fuafuaga fa’alemalo ae maise ai o laua siaki masani fa’a-le-soifuamaloloina.


O le Susuga ile Faafeagaiga o le Ekalesia a le Victory Power Ministry iā Waita Fata ma le faletua iā Melody Fata ma si a latou Ekalesia sa faamanuiaina ina ua āfea e le afioga ile Ao Mamalu o le Malo Samoa ma lana aumalaga. Na maua le avanoa e malele ai lana afioga ile Ao Mamalu o le Malo Samoa i luma o le fa’alapotopotoga to’a tele o le Ekalesia ma nisi sa auai e tusa ai o se upu faamalosi mai le Afioga Paia a le Atua faapea ai ma sina tala pu’upu’u e uiga i si ona tupu’aga i lona Nu’u pele o Falelatai. Na salani mea uma ole sauniga ile lauga fa’ai’u a le Susuga ile Faafeagaiga iā Waita Fata e fa’aautuina e faapea “E Galulue Mea Uma, mo le Lelei o ē Alolofa i le Atua” si’itia mai tusi a le Aposetolo o Paulo.


Sa toe fa’ai’u le sauniga i se saunoaga a le Ao o le Malo ma ia faafetaia ai Pastor Waita ma le faletua ia Melody mo le sauniga mamalu ma le lagonaina ole mafutaga a le Agaga Paia. Sa ia faafetaia fo’i le aufaipese (team) mo viiga matagofie o le Atua na usuina. O nisi o va’aiga matagofie ole tulaga mauāluga sa faatinoina ai e tiakono o le Ekalesia le puipuiga ma le fa’afeaoina o lana Afioga ma lona Masiofo i taimi uma o le la asiasiga ananafi. Na taualuga i se fa’aafe a le Susuga ile Faafeagaiga ma le faletua faapea Elders uma o le Ministry e ala i se taumafataga ma fa’aaloaloga mulimuli e pei ona masani ai le Atunuu i lana aganuu talimalo ma talitupu.


O le tofā ile Va’aimalae iā Asiata Falemalu Pio Vaoliko sa fai ma fofoga o le Ekalesia ile va ma aumalaga mamalu.

1,043 views

Comments


bottom of page