top of page

Auai le Sui Palemia fai ma sui o le mālō i le Miss Pacific Island 2024.


Talu ai ona o Samoa le atunuu na faaveina le tauvaga o lalelei o le Pasefika, o se tasi ia o mafuaaga e tatau ai ona auai sui o le mālō i le faamoemoe o le sailiga lalelei o le Pasefika tusa lava poo fea le atunuu talimālō.


Ao faagasolo ai tapenaga mo le tauvaga tele i lenei vaiaso e sailia ai se tamaitai e tauaveina le pale o le Miss Pacific, ae ua taunuu ai foi i Nauru le afioga i le Sui Palemia Hon Tuala Iosefo Ponifasio.


O Nauru le atunuu o loo talimālō, ma o le taimi muamua lenei talu ona faavae le Miss Pacific Island pageant ua fai ai i Nauru lenei tauvaga tele.


O Nauru e nao le 12 afe tagata e nonofo ai ma o se tasi o sui auai(member) o lea tauvaga.


O le Aso Sā na amatalia ai le vaiaso o le Miss Pacific Island, ma o lea na amataina i se sauniga lotu sa auai uma ai tamaitai, ae mo le sui o Samoa ia Moemoana Safaatoa Schwenke sa mafai ona faatasi atu le sui Palemia ma lona faletua.


O Samoa o loo avea ma taitaifono o lenei tauvaga tele a le Pasefika.


O le tausaga e 1987 na faavaeina ai e le mālō o Samoa lenei tauvaga, o le manulautī tupito ina ia faalauiloa le lalelei o le Pasefika e tauala atu i tamaitai mai i Atunuu taitasi.


O le vaiaso atoa lenei o le a faagasolo ai tapenaga ma polokalame ae lei oo i le aso mulimuli o le vaiaso e faia ai le tauvaga aloaia ma saili ai le isi lalelei e sui Tulaga i le tamaitai Papua Niu Kini o Josie o loo iai nei le pale mai le tausaga ua mavae 2023.

1,354 views
bottom of page