"E le'o sioki faia'oga ...fai se attractive package mo faia'oga". Faipule o Vaisigano 1.

O le aso lona lua lenei o le fono usu a le Palemene o le nei tausaga 2024 e pei ona amata mai i le Aso Lua 23 o Ianuari 2024.

O lo'o fa'agasolo le fa'atalanoaina o finagalo o sui faipule o le Maota i le Tala Fa'aaopoopo o Tupe 2023/2024 e pei ona sa folasia i le fa'aiuga o le tausaga 2023.

E ese'ese uma finagalo o sui taitasi mai Itumalo, o se avanoa foi e fa'ailo ai mana'oga a itumalo ina ia fuafua tatau ai le paketi ua fa'atulaga nei mo lene tausaga fa'aletupe.

Ae i le saunoaga a le faipule o le Itumalo o Vaisigano 1 le afioga ia Niuava 'Eti Malolo, sa tomua lana folasaga i fa'afitauli o agiga e a'afia ai faia'oga ma fanau a'oga.

Na saunoa le afioga i le alii faipule, i lona lava talitonuga e le'o iai se fa'aletonu po'o le sioki o faia'oga. O le manatu ma le talitonuga a Niuava, e iai lava le alavai lea o loo agai iai faiaoga ma e matua mana'omia ona fai iai se fuafuaga a le Matagaluega o A'oga ma Aganuu.

"E iai le talitonuga o lenei usugafono, e le'o iai se sioki o faia'oga. A silasila lau afioga i le tele o Matagaluega a le Malo, e toeitiiti a o faiaoga uma ma e iai le talitonuga e iai le drainage lea agai uma iai faia'oga".

O le atugaluga a le afioga i le faipule, o le tele o tausaga e a'o'oga ai fanau a le atunuu i a'oga fa'afaiaoga ae mae'a mai ua ese le matagaluega e aga'i iai ona o le tosina o seleni tetele e maua nai lo'o le faiaoga.

"Ae iai le talitonuga, fai se attractive package mo faia'oga".

O le talitonuga a le Minisita Lagolago, o le a'oga o le ivitu lea a le atunuu ma e mana'omia ona fai iai se fuafuaga vave a le Matagaluega ma le Malo.