top of page

"E le tāua ia te a'u ni faiga pātī; e tāua ia te a'u mana'oga o tagatanu'u". Minisitā o Galuega.





04 Setema 2023: O le vaiaso na te'a nei na tatalaina ai ni isi o poloketi a le malo e ala lea i 'auala gālue ma 'auala tetele i ni isi o Itumālo. O ni isi o 'auala ua tatala aloa'ia e aofia ai le Itumalo Fa'apalota o Va'a i Fonoti i Fagaloa.


O Fagaloa o le tasi nei o nu'u i le Itumalo o Va'a o Fonoti ua loa tausaga e le'i iai ni a latou auala ta mo femalaga'ina, aepeita'i o lea ua mafai ona lelei auala i lalo i polokalame ma poloketi o galuega tetele o lo'o feagai ma le Matagaluega o Galuega Tetele.


I luga o le polokalame a le Blutv le Tautai A'e i le Aso Faraile na saunoa ai le afioga i le Minisita o Galuega ia Hon Olo Fiti Va'ai, o nei galuega ua leva ona fuafuaina ma sa fa'atino lava lana galuega o le tula'i lea ma aga'i e va'ai nei afio'aga i se tulaga mana'omia o lo'o iai a latou 'auala.


Saunoa le Minisita, e le'i silasila i se tulaga o ni faiga pati, pe HRPP pe F.A.S.T e lagolago e le Itumalo ae sa ia silasila lava mo le atunu'u atoa.


I le tatala ai o 'auala o Fagaloa, ua laumanu'ia ai fo'i ni feso'ota'iga i fa'atosina o le faigapalota laitiiti mo le Itumalo ua tapena nei i le masina lenei o Setema.


Aepeita'i na fola manino e 'Olo, o nei 'aua ua leva ona fuafuaina i le tala fa'atatau o tupe ma le paketi a le malo sa iai i le tausaga ua tuana'i ae o le taimi lena o lo'o iai lava i le Vaega Fa'aupufai a le H.R.P.P le sui o Fagaloa lea ua fa'amoemoe e tamo'e i le fu'a a le vaega fa'aupufai a le Fa'atuatua i le Atua Samoa ua Tasi i le faigapalota la'itiiti.


"O auala nei ua leva ona fua mai i tala fa'aletupe talu ai, sa ave iai le fa'amuamua ona o tulaga fa'aletonu tele o nei 'aua....ua tele ina lelei auala uma o Samoa ae pei o le 'auala lenei e tatau a na ave iai le fa'amuamua ona e le'i o'o ai lava se 'aua ae le gata i lea o le puipuia o le saogalemu".


O le saunoaga manino lenei a le afioga i le Ali'i Minisita oa Galuega Tetele a le malo, ae o le fa'amoemoe maualuga ina ia lava le tupe e tu'uina mai e le malo i lana paketi e fuafuaina ai galuega mo auala i Itumalo ma afio'aga.




2,623 views

コメント


bottom of page