Ua pasia e le Kapeneta le toe fa'aa'e ai o le susuga ia Panoa Moala i le tofiga ta'ita'ifono o le Fa'alapotopotoga o Fa'aputuga Tupe mo le Lumana'i Manuia o Tagata.
Na saunoa le afioga i le Minisita o Tupe o ia fo'i o le Minisita o le N.P.F ia Lautimu'ia Uelese 'Afoa Va'ai e fa'amanino le fa'ai'uga a le Kapeneta ua mafua ai le toe fa'aa'e o le susuga ia Panoa.
E le'i faigofie le fa'ai'uga a le Kapeneta e pei ona saunoa Lautimu'ia, ae sa silasila le laulauafono a le Kapeneta i le itu o ni soligatulafono, e le'i iai se tulaga fa'apea o ni tulafono na solia e le susuga ia Panoa.
I le toe fa'aa'e ai o Panoa, ua iai ma ona aiaiga e tatau ona ia mulimulita'ia i le fa'atinoga lea o le galuega mo le atunu'u.
O le manulauti a le faigamalo e pei ona saunoa le alii Minisita, e taua lea mata'upu ina ia toe ta'u atu i tagata faigaluega a le malo, ia 'aua nei iai se fefe i le aufaigaluega e fa'aali ai ni manatu pe afai e silafia o lo'o iai ni lape ma ni faiga le tonu o lo'o alia'e ane i totonu o Matagaluega.
I le fa'aiuga a le Kapeneta, sa fua i luga o le lipoti ina ua leai ni fa'amaoniaga o ni soligatulafono e pei o le taufa'asese, gaoi ma isi ae se'i vagana ai le vaega e tasi lea na le mulimulita'i e Panoa, o le tulaga lea i faiga fa'avae tau pulega po'o le ta'ita'iga.
Ae mo le tulaga o fesiligia ai pe o iai se fa'aiuga e ono fai iai latou sa tagi i lea mata'upu, saunoa Lautimuia e leai lava se a'afiaga o tagata faigaluega ma e leai lava fo'i se mea e tupu.
Ae ua mae'a ona talosaga le Kapeneta i le ta'ita'ifono ma le pulega a le NPF, ina ia aga'i e auli a latou lapisi ma toe fa'atino lelei a latou galuega aua le atunu'u.
Comments