E tatau ona fa’amālōlō lē tumau le Ta’ita’ifono, ae se’i fa’agasolo le su’esu’ega.

O le talitonuga lea a le afioga i le Minisitā o le Matagaluega o Tupe ia Lautimuia Uelese Vā'ai, i le matāupu o loo tu'ua'ia ai le Taitaifono o le NPF ia Papāli'i Panoa Tavita Moala e pei ona fa'aseā ai le au faigaluega.

O loo lipotia e le Nusipepa a le Savali, ua māe'a tuuina atu e le Kapeneta i le Minisitā o le Matāgaluega o Tupe ma le Minisitā o Matāgaluega o Fa'alapotopotoga Tūmaoti a le Mālō ina ia silasila ai e tusa o faasinoala a le tulafono, pe e talafeagai ona fa'amālōlō le tūmau le ta'ita'ifono o le NPF ia Papalii Panoa Tavita Moala ae faagasolo suesuega o le mataupu.

I le talitonuga a le Minisitā ia Lautimuia, o ta'iala lava o loo ua taoto mo le faatinog o galuega ma suesuega a le Mālō i mataupu fa'apenei, e tatau ai ona fa'amālōlō lē tūmau le ta'ita'ifono, ae fa'agasolo su'esu'ega.

O aga masani lava o mataupu faapea, ina ia aua lava nei aafia pe iai se faalavelave i le taimi e faagasolo ai suesuega o sea matā'upu.

Ua mae'a taulimaina foi e le Minisitā le tusi fa'aseā a le aufaigaluega, ma o le nei tusi o loo fesiligia ai le tulaga o le Taitaifono, po'o faatino le tiute o Papālii e tusa ma ala faaletulafono o lo'o lima ta'ita'iina ai galuega a le Faalapotopotoga.

Na faailoa foi e le afioga i le Minisita i le mae'a ai ona tapā o se fautuaga faaletulāfono mai lōia a le Matāgaluega, ua fautuaina ai le afioga i le taitaifono ina ia tali atu i totonu o le 7 aso e tusa o tuuaiga uma nei.

Ma ua māe'a nei ona tali ane le afioga ia Papalii Panoa Tavita Moala e tusa o lenei matāupu.

I le tusi a le aufaigaluega, o loo fesiligia ai ala faaletulafono poo sa'o ona faia e Papalii ana faaiuga e tusa ma faasinoala a le tulafono a le Faalapotopotoga o Faaputuga Tupe mo le Lumanai Manuia o Tagata Samoa.