top of page

Fa'aauau galuega a leoleo i le tausia ma mata'ituina o le saogalemu ia Afega ma Levi Sale'imoa.



E ui o lea ua fofogaina le fa'ai'uga a le Peresetene o le Fa'amasinoga o Fanua ma Suafa i le mata'upu o fanua a le afio'aga o Afega, e pei ona tula'i mai ai se fe'ese'esea'iga a le nu'u ma Levi Sale'imoa i le vaiaso na te'a nei.


Ae peita'i o lea ua fa'aauau pea ona fa'atino galuega a le Ofisa o Leoleo ina ia mata'ituina le saogalemu o tagata o nei afio'aga.


O le poloa'iga a le fa'amasinoga o Fanua ma Suafa, na fa'ailoa ai le fa'ai'uga sa iai le tausaga e 1963 i fanua o Afega lea na tu'uina atu le 723 Eka mo afio'aga o Mauga ma Samalae'ulu e nonofo ai ina ua sosola 'ese mai ma Savai'i i le vaitau o le 1905-1911 lea na pa ai le maugamu i Sale'aula.


O le tausaga e 1911 na tu'uina atu ai nei fanua o se vaega o 'ele'ele a Fata ma Maulolo lea e fa'aigoaina o le Fa'atafafa o Fata ma Maulolo i ga'uta o Afega i nu'u nei mai Savai'i.


I le pito i uta o nei fanua e tua'oi ai nu'u nei e lua o Levi Sale'imoa ma Afega, ma o ga'uta tonu o le nu'u lenei o Leauva'a, o le fa'ai'uga a le Fa'amasinoga i le tausaga e 1963 o lo'o tumau ai pea le pule o fanua nei i alii ma faipule o Afega, e le'i iai fo'i ni talosaga Apili e apiliina ai lea fa'ai'uga e o'o mai lava i lenei tausaga.


I le mata'upu na tula'i mai, ina ua aga'i atu le nu'u o Afega e sua le latou auala galue i fanua nei ae tula'i mai ai loa se fe'ese'esea'iga ma Levi Sale'imoa.


O le fa'ai'uga a le Peresetene, e fa'aauau pea ona fa'atino galuega a le nu'u o Afega e tusa ai ma le fa'ai'uga o le fa'amasinoga o Fanua ma Suafa i le tausaga e 1963, ae se'i vagana ua fa'aulu se talosaga apili a le itu tete'e.


O le aga'i ai o le Matagaluega o leoleo i le fa'aauauina o le galuega, ina ia mautinoa le saogalemu ona o lo'o iai pea ni fete'ena'iga i va o nu'u e lua e ui ina ua mae'a ona fai le soalaupulega.



3,120 views

Kommentarer


bottom of page