Ua fa'ailoa e le Afioga i le Minisita o Leoleo ia Faualo Harry Schuster lona piitaga i se tasi o tagata o loo masalomia i le matāupu o le maliu o le taule'ale'a o Tuuau Faasavala lea na so'a e le taavale ma maliu ai i le Aso 21 o Aperila o le tausaga e 2021.
O le afiafi o le Aso Faraile na fofogaina ai se saunoaga a le mālō e pei ona fofogaina e le Sui Palemia ia Tuala Iosefo Ponifasio ina ua māe'a le fonotaga faapitoa a le kapeneta na fono ai i le aoauli.
O le matā'upu na laualuga ma faamuamua i le fonotaga lenei, o le matā'upu o loo suesueina nei pea e leoleo i le maliu lilo o Tuuau Faasavalu i le tausaga e 2021.
Saunoa Tuala, o le faamuamua a le mālō ua taula'i nei i se matā'upu o lo taligā ma tulituliāpū pea e le atunuu lona taunuuga.
"O lea matā’upu o lo’o tuliloaina pea e le mamalu o le atunu’u, ona o le tulaga maoa’e o le maliu ai o se tagata, ae ua silia ma le lua tausaga, e le’i mafai ona tu’uina mai e Leoleo se fa’amatalaga i se tulaga aloā’ia ua o’o i ai a latou su’esu’ega, pe fa’afefea fo’i ona tupu lenei fa’alavelave, a’o ai fo’i ua masalomia na tupu ai lenei fa’alavelave, ua mafua ai le maliu o Tu’uau"
E le'o nofonofoa'i le mālō i matauou faapenei ona o loo aafia ai faatinoga o galuega a ona itūtino aemaise o le fesiligia ai e le atunuu o le amiotonu.
I lenei matā'upu ua faailoa le faaauauina pea ona fai o suesue ma e leo taofia, ua maea foi ona faatalanoa ni isi o molimau tusitusia na tuuina atu i le Ofisa o leoleo.
I ni isi o molimau o loo iai foi ni tuuaiga i se tasi o loo masalomia e iai lona piitaga faale'āiga ma le Afioga i le Minisita o leoleoma o le ala lea ua faailoa ai e Faualo ona Piitaga i ni isi o loo aafia i le matā'upu.
Ua le mafai ai nei ona auai le Minisitā i le suesueina o lenei matāupu ogaoga.
"O le a fa’aauau pea le lē auai o le afioga i le Minisitā o le Matāgaluega o Leoleo, Falepuipui ma le Ola Toe Fuatā’ina, i lenei matā’upu ona ua ia fa’ailoa manino le i ai o lona pi’itaga i lē o lo’o masalomia na tupu ai lenei fa’alavelave".
Ua faailoa foi e Tuala, ua tapena foi le mālō ina iai se vaega tumaoti a leoleo mai fafo latou te faatinoina suesuega e tusa o le Maliu ai o Tuuau Faasavalu.
Comments