Fa'ama'ite le Matagaluega o Leoleo i se aso fiafia fa'atasi ma nu'u.

20 Tesema 2022.

Auapa'au Logoitino Filipo (Komesina o Leoleo) Left

A'o iai Samoa i le vaitau pisi mo le aga'i atu ai i Aso Fiafia o le Kerisimasi ma le Tausaga Fou, o se taimi pisi fo'i mo le Matagaluega o leoleo i le Mata'ituina lea o le Saogalemu lautele o Samoa.

Ae peita'i e le'i tu'ua ai le fa'ama'ite a le afioga i le Komesina o Leoleo e ala lea i se aso fa'apitoa mo fanau ma tupulaga o Lalomanu lea na fa'ataunu'uina i le vaiaso ua tuana'i.

O le aso lenei e pei o se aso e fa'atasi ma fiafia fa'atasi ai le Matagaluega o leoleo ma fanau ae o le fa'amoemoe maualuga ina ia fausia se so'otaga valelei o Malu o le Malo ma pulega a Ali'i ma Faipule i galuega fa'atino.

Na fa'atumulia lea fa'amoemoe i alo ma fanau aemaise o Matua na 'auai e lagolagoina lenei fa'amoemoe.

O se aso na faia ai ta'aloga a leoleo ma fanau talavou, aemaise o le avanoa na mafai ona fai ai ni ti'eti'ega a fanau i va'a petolo a Leoleo.

O le fa'ama'ite muamua lava lenei talu ona tulai mai le afioga i le ali'i Komesina o Leoleo le tofa ia Auapa'au Logoitino Filipo e ta'ita'ia le Matagaluega o leoleo.

E iai le fa'amoemoe maualuga a le Komesina o Leoleo ma le Matagaluega o le'a fa'aauau pea ona fa'atino le neie polokalame mo nu'u ma afio'aga i tua ina ia fa'amausali ai pea le galulue so'oso'o tau'au ai o le Matagaluega ma le mamalu o Nu'u ma Afio'aga.