O le aso Lulu lea na toso ai i tai le moana sausau le va'a o le Lady Naomi, e fa'amagoto ai ina ua mae'a ona pasia e le Kapeneta.
O le Lady Naomi, o le va'a lea na femalaga'i i le va o Samoa ma ni isi o atunuu o le Pasefika e pei o Cook Island ma Amerika Samoa i le tele o tausaga ua tuana'i.
Ona talu ai o le tele o vaega o lea va'a ua fa'aletonu ona e le gata ina umi ae o le tele o mala fa'alenatura sa la fetaia'i ao taula i le uafu ma malaga fo'i i va o atunuu o le Pasefika.
O le ala tonu lea ua manatu ai le Kapeneta ina ia faia lea fa'aiuga mo le saogalemu o tagata ona ua le'o toe lelei ma saogalemu mo femalaga'ina.
E le gata i lea ae sa maitauina le tele o se seleni e fa'aaluina i tausaga fa'aletupe mo lona toe fa'aleleiina.
O le taimi nei ua iai se tasi va'a ua fa'aigoaina o le Lady Naomi 60 e sui tulaga i lea va'a e pei ona sa tatalaina i le lua tausaga talu ai, lea na faimeaalofa ai le malo tele o Iapani.
O le tausaga e 1998 sa fausia ai lea va'a ma tuuina mai ai loa i Samoa lea na fa'aaogaina aua feoaiga ma femalagaina i va o Samoa ma Pagopago.
Comments