10 Iuni 2022
O le taeao ole aso Faraile 10 Iuni 2022 na faia ai se sauniga e amata ai le fa’aaliga a le au fai faatoaga ma le au failafumanu a le afioaga o Letogo aemaise o le sauniga lava foi lenei sa faatinoina ai male faamanatuina o le tutoatasi a Samoa.
O le alii Minisita o le matagaluega o Faatoaga ma Faigafaiva ia Laaulialemalietoa Polataivao Fosi Schmidt na saunoa e momoli le faamalo ma le faafetai i le pulega a alii ma faipule o le afioga o Letogo.
O fua o faatoaga o lafumanu ma nisi o atinae eseese e pei o ie vaivai ma nisi o meataulima na molimauina i lenei faaaliga. I le faamoemoe o le matagaluega o Faatoaga ma Faigafaiva e pei ona taua e le alii Minisita, o se taumafaiga ia unaia le ola male soifua galuelue o tagata o le atunuu.
E le gata e faamaite e le malo ae e iai foi auala e feosoasoani ai le malo ina ia mafai ona maua ni faitotoa mo maketi i atunuu i fafo e auina atu ai fua o faatoaga poo lafu manu foi a tagata Samoa o lo’o galulue mo atinae nei tau faatoaga.
Na saunoa foi le tofi o le afioaga poo le pulenuu e faafetaia le faamaite ma le lagalaga a le matagaluega o Faatoaga ma Faigafaiva ina ia toe fafagu mai pea le galulue o tagata e fa’aaoga ai eleele ma fanua.
Na faamatu'u pe faameaalofa atu foi e le matagaluega o faatoaga ma faigafaiva mea faigaluega e pei o uilipaelo, fagavao, agaese ma isi mea faigaluega e aoga mo faatoaga ina ia fesoasoani ai i le au fai lafumanu male aufaifaatoaga aua atina'e eseese.
Commentaires