top of page

Fa’amavae le isi faipule a le H.R.P.P.

Novema 25, 2022


Mau'u Siaosi Puepuemai (PC: Facebook)

E le'o le ta'ita'iga a Tuila'epa mafua'aga o le fa'amavaega a Mau'u Siaosi.

Ua tau'a'aoina nei e le faipule o le itumalo fa'apalota o Va'a o Fonoti lana fa'amavaega tusitusia i le Ta'ita’i o le vaega fa'aupufai e Puipuia Aia Tatau a Tagata (H.R.P.P) e pei ona sa ia tu'uina atu i le aso Faraile 25 Novema 2022.

I le tusi fa'amavae a le afioga i le Alii Faipule ia Mau'u Siaosi Puepuemai, ua ia folasia ai lona fa'amavae mai ai i le toe avea o ia ma sui o le vaega fa'aupufai a le H.R.P.P e 'amata atu i lenei aso.

Na ia ta'ua, e leai lava se mea o fa'aletonu i le latou va ma le ta'ita'i o le vaega fa'aupufai aemaise o ona sui 'auai uma; ma e na te lē tu'ua'ia fo'i le ta'ita'iga a le susuga ia Tuila'epa i le vaega fa'aupufai.

Ae pei ta'i ua ia fola manino se tasi o mafua'aga o lana fa'amavaega; ona o le tulaga ua fesiligia so'o ai pea o ia e lona itumalo i ni galuega fa'atino mo Va'a o Fonoti ae lea ua savali i le lua o tausaga talu ona tofia o ia e avea ma faipule o le Itumalo, ona e mafua mai lava i fe'ese'ea'iga fa'a le vaega fa'aupufai.

E le'i faigofie i le afioga ia Mau'u le faia o lenei fa'ai'uga;

"Ma ua ou manatu ai, e le faigofie ma e le taugofie fo'i mo a'u, ona ua loa ma asoa le tatou mafutaga"

Na fa'afetai e le afioga i le ali'i faipule le sao o Tuila'epa i le atunu'u i le tele o tausaga, ae o lana fa'ai'uga o lea ua sauni ai e fa'ase'etuagalu ina ia tuto'atasi aua le finauina o mana'oga a lona itumalo i le maota fono a le atunu'u.

O Mau'u Siaosi, o se tasi o sui faipule fa'atoa filifilia i le mae'a ai o le faigapalota ua tuana'i i le Aso 9 o Aperila o le tausaga 2021.

O le faipule o Va’a o Fonoti ua tolu iai nei sui faipule o le vaega fa’aupufai a le H.R.P.P ua fa’amavae; e pei o le faipule o Faleata 4 le afioga ia ‘Ale Vena ‘Ale ma le faipule o Si’umu ia Tu’u’u Anasi’i Leota.


2,746 views
bottom of page