top of page

Fa'anoanoa le pūlega a ‘Ato Faoagali i le Asosi Fusu a Samoa.

12 Tesema 2022.


Ato Plodzicki-Faoagali

I le mavae atu o nai vaiaso talu ona o'o atu ni isi o alo fusu o Samoa i ni isi o la'asaga o ta'aloga faipelega lea ua sui mai ai i le vaega o fusu'aga tapenapena (Amateur) aga'i atu i le tulaga o fusu'aga fa'apolōfesa.


O le taualuga ai o se fusu'aga na tu'ufa'atasia e le kalapu fusu a Malisi na faia mai i Samoa i le masina 'ua tuana'i, lea na manumālō ai ma aloa'ia ai o se ali'i fusu ua se'e atu i fusu'aga fa'apolōfesa.


Ae peita'i i le mae'a ai o lea fa'amoemoe ma ua toe taliu nei i Ausetalia i le Atunu'u o lo'o aumau ai, ae ol ea ua aumai nei se fa'anoanoaga a le faia'oga ma o ia fo'i o le tua'a o le susuga ia Ato Faoagali.


O le fa'anoanoaga a le susuga ia Steve Faoagali na lōmia ina i luga o le facebook a Ato Plodzicki-Faoagali; ua fa'aali ai sona fa'anoanoa e fa'asaga lea i le fa'alapotopotoga o Fusu'aga/Faipelega a Samoa 'ona o le leai lea o se amana'ia ina o se matati'a ua ausia e a alo ma fanau a Samoa lea ua o'o i le tulaga fa'apolofesa ia Ato ma Faustina Marion Ah Tong.


Na fa'ailoa e Steve, e le'i iai lava se latou talanoaga po'o se feiloa'iga ma le fa'alapotopotoga o faipelega a Samoa talu ona mae'a nisi o ta'amilosaga lea na tau'ave ai e 'Ato le igoa o Samoa ma manumalo mai ai i ni isi o Pine i Ta'aloga o mālō o le taupulega.


Sa tūsia ma fa'ailoa e le susuga ia Faoagali, sa iai lona manatu o le 'ā iai se feiloa’iga ma le fa'alapotopotoga o faipelega a Samoa e aloa'ia ai le sao o 'Ato i le tele o tausaga aemaise ai o lona mauaina ai o le Pine Siliva mai i ta'aloga a le Commonwealth i lenei tausaga 2022, peita'i ua na'o le afioga ia Tuaopepe Jerry Wallwork o le peresetene o le Au si'isi'i U'amea Mamafa a Samoa, o le pulega a ta'aloga a Samoa po'o le SASNOC ma le kalapu fusu a Malisi.


I le fa'ai'uga o le tusitusiga a le susuga ia Faoagali, ua fa'ailoa ai o Ato e le'o fusu mo se kalapu o lo'o fusu mo Samoa atoa.


O le susuga ia 'Ato Faoagali na amata mai lava lona olaga fusu a'o laitiiti se'ia o'o lava ina matua ma o lea ua avea ai nei o ia ma se tama fusu Samoa fa'apolofesa e pei ona sa faia mai ai lea i Samoa i le masina o Novema.


689 views

Comments


bottom of page