top of page

Fa'atautō Minisitā fou o le Kapeneta.


Fa'atautoga a afioga i Minisita Fou i luma o le Ao o le Malo o Samoa/ Demetrius Ah Mau.

12 Setema 2023: O le asō ua faatautōina ai Minisitā fou a le Kapeneta i luma o lana afioga i le Ao o le Mālō ia Tuimalealiifano Va'aleto'a Sualauvī II.


O le sauniga o le faatautoga sa faataunuuina i Maota o Tuiatua Tupua Tamasese Efi i Sogi.


O le afioga ia Lautimuia Uelese Vā'ai ua tōfia ma ua aloa'ia e avea ma Minisitā o le Matagaluega o Tupe ma le afioga ia Laumatiamanu Mathew Ringo Purcell ua fa'atautoina ma filifilia e avea ma Minisita o le Matāgaluega o Ta'aloga.


O afioga i Minisita fou sa faamaonia o lāua tofiga i le mae'a ai o fono a le Kapeneta i le vaiaso ua tuanai ma ua faamaonia ai nei faatulafono e lana afioga i le Ao o le Mālō o Samoa.


Hon Fiame Naomi Mata'afa/ Demetrius Ah Mau.

O le afioga i le Palemia, Hon Fiamē Naomi Matā'afa na saunoa i le saunoaga autū o le sauniga fa'atautō.


I le saunoaga a Fiamē, o le faaopoopoina o numera o Minisita o le Kapeneta; o le so'o una'iina mālosi lea o galuega a le mālō ma le agaga maualuga ina ia mapo le auaunaga ma le tautua e tuuina atu i le atunuu.


O le afioga ia Lautimuia Uelese Vā'ai o le sui faipule o le Itūmālō faapalota o Vaimauga 3 sa filifilia mai i le faigāpalota laitiiti a le itūmālō i le tausaga ua tuanai ina ua tuumālō le afioga ia Tapunuu Niko Lee Hang le sa tulai i le foe o le Itumālō. O Vā'ai o se tamālii sa faauluulu iai le Kamupanī vaa a Samoa ma ua loa tausaga o galuega i matagaluega eseese a le Mālō.


O le afioga i le Minisitā o le Matāgaluega o Taaloga ia Laumatiamanu o se tamāli'i foi ua loa lana tautua i le atunuu e pei ona sa galue ai foi i le Matāgaluega o Leoleo i le tele o tausaga.




Commentaires


bottom of page