Faafeiloa'i le 2023 i loimata o le tinā ma le fanau.

4 Ianuari 2022.

Tofē i Fagaafau

O le tamā 55 tausaga le matua o le soifua o le afioaga o Asau i Savai'i na sailia e lona aiga ae ua toe 4 ai o Aso ona taualuga lea o le 2022.

O le tamā ia Tasi Pologa Tuipeā, na lipoti ane e lona aiga i le Ofisa o Leoleo i Asau i Savai'i e mana'omia ai le fesoasoani mo le tau sailia ai o ia.

O le faamatalaga a le faletua o Tuipe'a ia Saunoa, e le'i iai lava se mea na tupu i le la aiga ma si ona toalua ae pau le mea na ia iloa sa alu o ia i lana fe'au i le aso mulimuli lava lea na leiloa mai ai .

I le 4 o aso talu ona tau sailia pea e lona 'aiga na logo ane ai e le 'āiga ia le tu'ua o le nu'u o Falelima le fetalaiga ia Folasā le mana'omia lea o le fesoasoani ona ua māua o lo'o leiloa le tamā i le va o Falelima ma Sāmata.

Na tapena ai lava le tu'ua o Falelima ia Folasā i lenā aoauli i le mae'a ai o toonai o le Aso Sa muamua o le 2023 ma aga'i faatasi ma le aiga e Saili lona tino i nisi o nofoaga o Falelima; na tā'ua e Folasā na fa'aau mai pea le latou sa'iliga i tuā'oi o Falelima i le vaotele o Si'uvao ma o'o mai ai loa i le tofē i Fagaafau ma iloa atu ai le asa tele o le vao, o le agai atu iai na latou iloa atu ai le ta'avale lenei na saili o lo'o ti'eti'e mai luga o ma'a i lalo o le tofē.

Na logo loa le Ofisa o leoleo ma le vaega o tineimu mo se lavea'i ma o lea na iai ma le fesoasoani a le afioaga o Fagafau ma nisi o nuu tuaoi.

O le tamā ia Tasi sa galue i le Matagaluega o Punaoa Faalenatura ma le Siosiomaga i lona Ofisa i Asau i Savaii.

E momoli atu faamaisega i le tina ia Saunoa aemaise o le fanau ma le aiga faanoanoa.