Faaulu le tagi a Levī Saleimoa faasaga i le faipule o Sagaga 2.

Ua sāuni le afioaga o Levī Saleimoa e faaulu le tagi e faasaga i le alii faipule o Sagaga 2 ia Maulolo Tavita Amosa ma le Matāgaluega o Leoleo i ni tuuaiga o le totogiina o se tupe i leoleo ao faatino galuega i Mataupu i le va o Afega ma Levi Saleimoa.

Na fa'amaonia mai e se tasi o matai o le afioaga ina ua talanoa mai i le Blutv, ua mae'a ona soalaupule alii ma faipule o le nuu i le Aso Gafua na mavae atu nei i le Aso 6 o Novema 2023.

O le tagi a le nuu ua faaulu atu nei i le Ofisa o Sulufaiga, ina ia faatino se suesuega faapitoa mo le faipule o Sagaga 2.

O le tagi a le afioaga, ona sa māua i se ata video le tuuina atu e Maulolo o le tupe e $2000 i alii malu o le mālō ma faaupuina o le faaaloalo i le fa'aaugagase i le tausia o le filemū mo nuu e lua ona o mataupui fanua.

O le mataupu lenei i fanua o nuu nei e lua sa faia ai le faaiuga a le faamasinoga o Fanua ma Suafa i le tausaga e 1963, ma o lea na toe agai Levī i le faamasinoga mo se fesoasoani ina ua taumafai Afega e faatino ni galuega i luga o nei eleele e latou te talitonu o fanua tau Levī Saleimoa.

Tā'ua e le matai o le afioaga o Levī, ua māe'a ona faatalanoa ma autasi le nuu ina ia toe apili le faaiuga a le Faamasinoga o Fanua ma Suafa , e pei ona fofogaina e le Afioga i le Peresetene ia Lesatele Rapi Va'ai; e faatumauina ai pea le faaiuga a le Faamasinoga i le pule o nei eleele i uta ane o Levī ma Afega ia Maulolo ma Fata o Afega.