Photo: Lauano Demetrius Ah Mau
Ua toe o se aga ona taunu'u lea i le aso fa'apitoa mo tina, le aso Sa o Tina lea e fa'amanatuina e le atunu'u i le 12 o le masina o Me i tausaga ta'itasi, ua fa'apitoa ma amanaia ai le sao taua o tina i Samoa nei.
O vaaiga masani lava i vaitau fa'apenei o le fa'atumulia o le taulaga o Apia e le gata i faleoloa o faleaiga ma so'o se vaega o le taulaga i faiga fa'atau a le atunu'u mo le aso Sa o Tina fa'apea fa'amoemoe a nu'u, ekalesia ma nisi o fa'alapotopotoga i Samoa nei.
O le ala lea o le taulogologo a le Matagaluega o Leoleo Falepuipui ma le Ola Toefuataina i le logologo puiali'i ma le toe fa'amanatu i le atunu'u ia tautuana meatotino ia sefe ma malu lelei a'o lei tuua maota ma laoa mo faiga fa'atau i le taulaga, o le lokaina lelei o ta'avale a'o le'i aga'i ese ma le vaai lelei o fa'atau i totonu o so'o se faleoloa ma nofoaga o le a fai ai faiga fa'atau. O lo'o ave lava le fa'amamafa i aiga o lo'o aumau i le taulaga, aua e pisi i faiga fa'atau mo taumafataga ma ofu mo tina ae le mapu ai ma le fili i le au gaoi ma le lima tagovale fa'apea ma le au talepe fale.
Na fautuaina fo'i e le matagaluega le atunu'u atoa ina ia tausi lelei le va nonofo ai i nu'u ma alalafaga ina ia maua manuia e Samoa se Aso Sa o Tina fiafia, saogalemu ma le filemu mai i le Ali'i.
Comments