Fautuaina e Vui Clarence Nelson le faia o a’oa’oga i fanau mo le saogalemu ‘i le initaneti.

1 Novema 2022

PC: Website- Pacific Community.

O le Aso Lua 1 o Nōvema 2022 ua tatala aloa'ia ai le Aso ua fa'aigoaina Cyber Smart Samoa o le fa'amoemoe ina ia fa'alauiloa galuega fa'alauiloa mo so'o se tagata Samoa i auala e puipuia mai ai i le fa'aaogaina o ‘Upega o feso'ota'iga fa'aonaponei e pei 'ona tu’ufa'atasia ‘e le Matāgaluega o Feso'ota'iga ma Fa'amatalaga Fa'atekonolosi.

O le fa'amoemoe la o le vaiaso 'atoa, o le 'ā mafai ai ona fa'ataunu'uina ai ni mafutaga fa'alea'oa'oga i tua i le lautele i ‘auala e mafai ona saogalēmū mai ai i le fa'aaogaina o ‘upega o feso'ota'iga i le initaneti.

E lē gata i lena, 'ae o se itu lelei e fa'alauiloa ai le tāua ‘o le galuega o lo'o feagai ma ni isi o itū tino o tūlaga tau i feso'ota'iga fa'aonaponei ma lona fa'aaogaina lea o lo'o iai nei se itū tino ua fa'aigoaina ‘o le Samoa Cyber Emergency Response Team SamCERT).

I lenei fa'amoemoe na saunoa ai le Afioga ia Vui Clarence Nelson o sē tasi o Fa'amasino Sinia o le Fa'amasinoga Maualuga a Samoa e molimoli se fautuaga ‘ae ‘o se fe'au tāua mo lea fa'amoemoe.

Na fa'afetaia ‘e le afioga i le Ali'i Fa'amasino ia le fa'ama'ite a le Ali'i Minisitā ‘a le Matāgaluega o Feso'ota'iga lea o lo'o nafa nei ma le tu'ufa'atasia o lea fa'amoemoe tāua.

O se vaega o le saunoaga a le afioga a Vui, na ia tu'u atu ai se fautuaga i le matāgaluega 'ina ia silasila lea i le galulue fa'atasi ai ma le Matagaluega o A'oga Ta'aloga ma Aganu'u ina 'ia fa'amālosia le iai o se mata'upu i tūlaga o 'auala ese'ese e puipuia ai fanau mai i le fa'aaogaina o ‘upega o fa'amatalaga 'ona o a'afiaga i le mauaina e fanau o le avanoa e matamata ai i nisi o itūlau lē fa'atūlāfonoina i ‘upega tafa'ilagi.

I le fa'atalanoaga ma le afioga ia Vui, na ia fa'ailoa ai le maualuga o le numera o fanau talavou ua o'o atu 'i le fa'amasinoga ‘ona o matā’upu e pei o le fa'amalosi teine, mafua mai ona o le matamata lea i nisi o ata lē talafeagai i luga o Upega o feso'ota'iga ma fa'aosofia ai nei lagona e fa'atino nei soligātulāfono.

O le finagalo o le Afioga ile Ali'i Fa'amasino ia Vui, o se tūlaga ua tatau 'ona toe silasila iai le malo 'ina ia fa'amalosia tulāfono ma toe fa'afou nisi o feagaiga o lo'o aiaia ai tulaga soligā tulāfono ese'ese aemaise ona o lea ua iai nei i le taimi o le tele o lu'itau fou 'ona o le Fa'atekonolosi.

Ae ‘e lē gata i lenā, na saunoa fo'i Vui, o isi itū tāua e tatau ona silasila iai lenei polokalame o le tāua lea 'ona fa'ailoa i tupulaga ma ia malamalama i soligātulafono e a'afia ai 'ona 'o le fa'aaogaina i ni auala lē tatau o le ‘upega o feso'ota'iga.

Na momoli le fa'afetai 'a le Mālō o Sāmoa e tauala mai i le Matāgaluega o Feso'ota'iga i ana pa'aga e pei 'ona mafai ai ona fa'ataunu'uina ma tatalaina lenei aso Tāua, o nei pa'aga e aofia ai le vaega o le Vā i Fafo a Ausetalia ma le ‘Ofisa o le Vā i Fafo a Niu Sila.