top of page

Fesiligia le lē toe faia o se feiloaiga a le Palemia ma le au tusitala a Samoa.


E ui o se sauniga o le faamanatuina o le aso mo le au tusitala ma faasalalau i le lalolagi, ae sa maua ai ma le avanoa na fesiligia ai e se tasi o Tusitala Sinia a Samoa le Fetalaiga i Galumalemana Tipi Auatagavaia le tamaitai Palemia i se tasi o matā'upu e tatau ona tali mai ai.


I le mae'a ai o le lauga autū a le Palemia, Fiamē Naomi Mataafa i le aso faamanatu a le au tusitala na faia i le Fale Samoa o Turisi i le Aso Faraile, na avea ai le fetalaiga ia Galumalemana e fai ma sui o Asosi o Tusitala Samoa le J.A.W.S e momoli le faafetai.


O le avanoa lea na fesili ai le tusitala sinia i le Palemia, pe iai se mafuaaga ua lē toe faataunuuina ai faatasiga masani a tusitala ma lana afioga e ala i le tali mai i mataupu e tatau ona silafia e le atunuu lautele.


Aepeitai, na tali mai lava i lea po le Palemia, ma saunoa ai o le 'a toe va'ai i se taimi e toe faaauauina ai lea faatasiga masani ma tusitala.


O le feiloaiga mulimuli a Tusitala ma le Palemia, o le masina o Setema i le tausaga na tea 2023.


O le tāua o nei feiloaiga e pei ona tā'ua e Galumalemana, ina ia manino le atunuu lautele i le tali a le mālō i le tele o mea o loo tutupu i le mālō.


O le faatasiga a Tusitala i lea po, o le taimi muamua lea ua lauga ai le palemia o loo iai nei le afioga ia Fiame Naomi Mataafa i le faamanatuina o le Aso o Saolotoga o Tusitala i le Lalolagi.


O le taimi mulimuli na faia ai se sauniga faamanatu faapea a le Asosi o Tusitala ma Faasalalau, o le tausaga na aafia ai Samoa i le Koviti 19.


Na momoli faalauaitele le faafetai a le Palemia, i le tāua o le galuega a Tusitala o loo faia nei i le atunuu.

1,907 views

Comentarios


bottom of page