top of page

Fola manino e le Fofoga Fetalai ona tiute e tali atu ai i ni tu'ua'iga.

1 Fepuari 2023.


Fofoga Fetalai o le Maota Fono a Samoa le Afioga ia Papali'i Li'o Olo'ipola Ta'eu Masipa'u.

Ua matua fola manino e le Fofoga Fetalai o le Maota Fono a Samoa le afioga ia Papali'i Li'o Olo'ipola Ta'eu Masipa'u i le lautele ona tiute tau'ava ma ona nafa i se pepa o fa'amatalaga fa'alaua'itele i le Aso 31 o Ianuari 2023.


O le afuaga o lenei fa'asalalauga ona o ni isi o tu'ua'iga ua faia fa'asaga ia te ia e fa'apea, 'o lo'o fa'atonuina e se tasi o Minisita o le Kapeneta ia i le fa'atinoina o lana galuega'.


E 9 ni fuai'upu fa'apalakalafa na taumafai ai le Fofoga Fetalai e fa'amanino nei vala mo le silafia e le atunu'u ae o se tali atu fo'i i ni tu'ua'iga ua manatu ia e leai ni fa'avae.


Ua fa'ailoa manino e le fofoga fetalai, o le tofiga lava fa'a fofoga o le fono e le mafai ona aiaina e se isi po'o se vaega ia po'o le kapeneta fo'i.


" I le fa'agasologa o Galuega fai ma Taualumaga uma a le Palemene lona VXII talu ona tula'i mai, e le'o aia ina lava e le Pule fa'atonu/kapeneta tiute ma matafaioi a le fofoga Fetalai."


Ua fa'aalia foi e le afioga i le Fofoga Fetalai, ina ua tulai mai le faigamalo filifili, ua mafai ai nei ona toe fa'afo'i lava le fofoga fetalai i lona tulaga tuto'atasi ma ua le toe iai se aia ina e le pule fa'atonu ma o lona talitonu o se tulaga aupito sili lea ona lelei e pei lava foi ona talanoa ai le tulafono maualuga ma le fa'avae a Samoa.


O le isi o atugaluga a le afioga ia Papali'i, o le fa'aaogaina lea o upega o feso'ota'iga fa'aonaponei e tu'ufatasi ai ni ata video ma fa'aseseina ai pe tu'ua'iseseina ai le ta'ita'iga a le Fofoga Fetalai i le Maota.

297 views

Comments


bottom of page