"Ia tautuana le tatou au'aunaga ma le tautua i le atunu'u, ia malu ma mapo".Palemia i Ofisa Sili fou

O 'upu fa'amalosi ia a le afioga i le Tama'ita'i Palemia ia Fiame Naomi Mata'afa, i lana saunoaga autu i le sauniga fa'atau mo ali'i ma tama'ita'i Ofisa Sili Fou a Matagaluega ma Fa'alapotopotoga ese'ese a le malo.

O le aso Lua 21 Novema 2023, na fa'ataunu'uina ai lenei sauniga i le Maota o Tuiatua Tupua Tamasese 'Efi i Sogi.

O lenei sauniga na fa'atautoina ai Ofisa Sili fou e to'a 11, sa fa'amaonia ma filifilia e le Kapeneta i le tausaga ua te'a ae o lea fa'ato'a fa'ataunu'u le sauniga fa'atauto aloa'ia.

O le saunoaga a le malo na saunia e le Palemia, sa lilifa lava i le fa'amanatu lea i afioga i Ofisa Sili le taua o le latou galuega i le fautuaina o ta'ita'i e ala i fa'ai'uga fai mo le lelei auiluma o Samoa.

"Ia ma'elega la outou silasila, i 'auala e matimati ai le tatou galuega aemaise le fa'afoeina lelei o le aufaigaluega e ala i ppulega lelei".

E le gata i lea, ae sa fa'amanatu le afioga i le Tamaitai Palemia i Ofisa Sili fou ina ia silasila lelei i 'auala e mafai ona aputiputi lelei ai le tama'oaiga o Samoa ina ia aua nei soifua fia 'a'ai le atunu'u i so'o se manaoga ma so'o tulaga.

"Ua feagai nei le lalolagi ma luitau ogaoga o suiga o le tau, o taua ma fevaevaeaiga, fa’ama’i, ma le tau faasoasoaina o le tamaoaiga, atoa ai ma le maua pea o taumafa. Mo se atunuu laititi e pei o Samoa, e faataua le fuafua lelei o lo tatou tamaoaiga, ia aputiputi nai a tatou ālāmanuia, ma ia tatou soifua ma ola, e tusa ma le foai a le Atua ua o tatou maua".

O i latou e to'a sefulutasi, e aofia ai le Ofisa Sili o le Matagaluega o Aoga, Ta'aloga ma Aganu'u ia Aeau Chris Hazelman, Ofisa Sili o le Fa'alapotopotoga o Su'esu'ega Fa'asaienisi ma le Fale Su'esu'e a Samoa(SROS) ia Fiso Dr. Fiame Leo, Ofisa Sili o Tiute ma Tupe Maua ia Fonoti Talaitupu Li’a Taefu, Failautusi poo le Ofisa Sili o le P.S.C ia Kolone Tikeri, Ofisa Sili o Fa'aputuga Tupe mo le Lumana'i Manuia o Samoa(S.N.P.F) ia Lemalu Selesitina Puleaga Meni-Reti, Ofisa Sili o le Faletupe o Atina'e(D.B.S) ia Mua’autau Raie Silipa, Ofisa Sili o le Fa'alapotopotoga o Fale(S.H.C.) ia Sautiamaivasa Titimaea Tiotio, Pule Sili o le Kamupani Va'a(S.S.S.) ia Tafesilafai Ipiniu Filipo, Komesina o Faiga Palota ia Tuifelolo Alexander John Stanley, Pule Sili o le Ofisa o Tausi Mavaega iaTuitoga Christina Angela Te’o Faitele ma le Pule Sili o le Iunivesite Aoao o Samoa ia Tuifuisa’a Patila Amosa.