Līua le fiafia i le fa'anoanoa; To'alua na maliliu i le 'aiga e tasi.

Novema 16, 2022

Na liua le fiafia i le fa'anoanoa ina ua maliliu ni isi pele i le 'aiga Tufulele Uta i le taeao o le Aso Sa 13 lea na tatou sami ai le siamupini a le Toa Samoa i le ta'aloga ma Enelagi.

Na malama ane le taeao o le Aso Sa, ma maua ai e le 'aiga o le tama ua 52 tausaga lona matua le maliu ai o ia i lona lava maota, na fa'anatinati atu i le falema'i aepeita'i ua uma lava lona soifua.

A'o fa'ananati atu i le falema'i, na tula'i mai ai se fa'alavelave tau ta'avale afi ma maliu ai se tasi sa malaga i lea lava ta'avale, o le tama na maliu i le fa'alavelave lenei; o le tuagane o le tina lea ua maliu si ona to'alua i le aso lava lena.

O se fa'alavelave e faigata ona taliaina e le nei 'aiga ona o le aso e tasi lea na maliliu uma ai nei tama i le latou 'aiga.

Ua fa'amaonia mai nei e le Matagaluega o Leoleo ni su'esu'ega o lo'o ta'oto nei i le Ofisa i le mafua'aga o le tula'i mai ai o lenei fa'alavelave tau ta'avale afi na maliu ai sia tama.

O le vaiaso ua te'a na maitauina ai le tula'i mai o ni isi o fa'alavelave tau ta'avale afi ma a'afia ai le soifua a ni isi o le atunu'u.

O le fa'amanatu a le Matagaluega ia Samoa, ina tautuana le saogalemu i lenei taimi ua iai Samoa i le aga'i atu ai i aso fiafia aemaise lava fo'i o le vevesi lea ua iai nei i faiga solo ta'avale mo le lagolagoina lea o le Toa Samoa.

E momoli atu ai fa’amaisega i ‘aiga fa’anoanoa ona o le toesea o nei tama i o latou ‘aiga.