top of page

Lagolagoina e le Palemene le toe fa'a'upu lelei o le 10% mo tama'itai faipule.


Ua fa'amaonia ma talia e le Fono Aoao Faitulafono a Samoa, ni fautuaga a le Komiti na nafa ma le iloiloaina o matāupu tau i faigāpalota e aofia ai ma le 10%.



O le fautuaga a le Komiti, ina ia toe āsia le tusiaina o le tulafono o le 10%, ma e tatau ona toe fa'aupu lelei ma toe teuteu ina ia manino fuaiupu taitasi.



O le fautuaga mai i le Komiti Faapalemene, ua tele ai manatu ua lagalagā ona o fevesiaiga na tulai mai i le tausaga 2021, ina ua māe'a le faigapalota tele a le atunuu.



I le folasaga a le taitaifono o le Komiti faapalemene, ia Auapaau Mulipola Aloitafua ina fofola le latou lipoti i le laulauafono a le Palemene; na ia faailoa le le'o kilia ona faaupu o le tulafono lenei mo le 10%.



O lea sa ia talosagaina ai, e tatau ona toe faaupu ma teuteu ina ia manino ma maioio auala e saili ai le aofai tonu o sui tamaitai e tatau ona iai i le 10% lenei.



I felafolafoaiga a le maota fono, na mafuli lava i le lagolagoina o le 10% ae e tatau ona toe faatulaga ona aiaiga ma pe faapefea ona galuea'ina le 10% e fua i aofai o nofoa o le Palemene.



Ua pāsia nei e le Palemene, le toe teuteuina o le tulafono lenei ae o le 'a tuuina atu i le kapeneta mo ni fautuaga e talafeagai, ma toe lipotia ai i le Palemene i le isi aso fono o loma.



O le masina o Tesema o le tausaga lenei le fono mulimuli a le Palemene i le nei tausaga 2023.


Comentários


bottom of page