Leai se laisene 'avepasi a le ali'i na fa'afoeina le pasi a le Laumoso'oi.

Ata Pu'eina: Samoa Global News.

A'o fa'agasolo ai su'esu'ega a leoleo e tusa o le fa'alavelave na lavea ai le pasi o le falepasi a le Laumosooi i le Aso Gafua i Malifa, ua fa'amaonia mai e leoleo i le amataga o le su'esu'ega; o le ali'i na 'aveina le pasi e leai sana laisene e mafai ai ona ia fa'afoeina se pasi la'u pasese.

Ua le gata e leai se laisene ae ua maua fo'i e leoleo e le'i pasia pe na toe fa'afou le resitala a le pasi lenei.

Ua fa'amaonia mai, ua to'alua tagata o le pasese o lenei pasi ua ma'imua le soifua ma isi o le pasese o lo'o taofia nei i le maota gasegase e aofia ai ma le 'avepasi.

Saunoa le sui Komesina ia Papali'i Monalisa Tia'i Keti, e iai moliaga e molia ai le avepasi ma e fa'apena fo'i ma le falepasi e ona pasi ona o le fa'afaigaluega o se tagata e leai se laisene.

E amamafa fa'asalaga o se tagata e ave ta'avale fa'asolitulafono aemaise o le a'afia ai o soifua a ni isi tagata.