top of page

Loka e leoleo Solomona le ali'i 20 tausaga masalomia i le maliu o le pailate Samoa o Fred Puni.


Ua taofia e leoleo se alii Solomona e 20 tausaga le matua ua masalomia e tusa ai o le faalavelave na aafia ai se alii Pailate Samoa e suafa ia Fred Puni i Honiara i le aso 3 Tesema 2023.


Na fa’amaonia mai e le Fa’atonusili o le National Traffic Department o le Royal Solomon Island Police Force (RSIPF), o lo’o taofia nei le ua molia i le toese a leoleo.


” O le ali’i e 20-tausaga le matua o le a taofia lona igoa ona o le puipuiga. O le aso ananafi na taofia ai o ia ma o lo o fesiligia nei e Leoleo. O loʻo faʻaauau pea suʻesuʻega ma o loʻo galulue a matou ofisa i lle sailia o faʻamatalaga uma e fesoʻotaʻi ma le faʻalavelave."


O le ua maliu o le susuga ia Fred Puni, o se tamali'i Samoa ma e iai lona pi'itaga i Le Atu Kuki ma o lo'o nofo nei i Papua Niu Kini ona o lo'o faigaluega ai o se pailate(pilot) i le kamupani va'alelel a lea atunu'u.


Ua faamaonia e le susuga Foufaka le ua maliu o se pailate i le kamupani vaalele a le Air Niugini ma sa malaga atu i Solomona ina ua valaaulia e lona uso, o se fomai i le au a le Atu Kuki mo taaloga a le Pasefika ua 5 tausaga e lei toe vaai i ai.


E fa'apea le lipoti a leoleo, sa i ai le ua maliu ma lana uo i luma o le fale'aiga i le vaega e ta'ua o Baha'i Eria ma o le taimi lava lea na lavea ai i le ta'avale i le taeao lava o le Aso Sa.

Na taua e le vaega fa’asalalau a Leoleo e fa’apea, o le ta’avale o lo o aga’i i le itu i sasa’e i le ma e fai lava sina saoasaoa aemaise o lea ua maua nei sa fa'asua'ava le ali'i talavou na faafoeina lea ta'avale.


O le aso ananfi lea na fa'ataunu'uina ai sauniga fa'ale'aiga a le ali'i pailate i totonu o Papua Niu Kini ina ua talosaga mai ai le atunu'u ao lei malaga mai lona sa i lona aiga i Alafua Samoa mo ona toe sauniga mulimuli.


Na fa'atumulia le sauniga fa'alea'iga sa faia i Papua Niu Kini, i uo ma aiga aemaise o Pailate uma sa latou galulue ai i totonu o Papua.


O Fred Puni ua 48 tausaga le matua lona soifua, o se alo e fa'asino i le tina foma'i o Dr Teremoana Puni nee Tupa ma Dr Emosi Puni.


E maliu le susuga ia Fred Puni ua to'afa nai o la'ua alo.

1,633 views
bottom of page