top of page

Mōlia le faipule o Sagaga 1 ma lona faletua; Tapena fo'i le lā tagi faasaga i le 'āiga na latou vevesi.


E le'i to'a lelei le matā'upu i le vā o le alii faipule o Sagaga 1 ma ona tau'āiga i Faleula, lea na tulai mai ai se vevesi ma i'u ai ina tula'i ane le faalavelave na faatamaia ai meatōtino ma le fale o lea 'āiga i le malaia.


Ae i faasalalauga a le itūlau o le Vaega Faaupufai e Puipuia Aiā Tatau a Tagata(H.R.P.P) na fai ai le saunoaga a le faipule ia Loau Keneti Sio e tali ai i ni isi o tuuaiga sa fai e faasaga ia te ia ma lona faletua.


I lea feiloaiga ma ni isi o le 'au fa'asalalau i le Aso Toonai ua mavae atu nei, na na ia faamatala ai le mafuaaga o le tulai mai o lea vevesi i le va lea o ia ma 'āiga o lona tinā.


O le matā'upu na amata mai i le po o le Aso Lua le vevesi i le maota o le alii faipule, ina ua taunuu atu lea 'āiga ma molimoli atu ai le tusi a le latou lōia e tusa o matā'upu tau fanua, ae peitai na tulai mai ai loa se fe'ese'esea'iga, na i'u ai i se fa'ao'ogālima lea na faamatalaina e le 'āiga ma le tamaitai na a'afia, na faia e Loau ma lona faletua.


Na faila tagi a le 'āiga e faasaga ia Loau, ma na mōlia ai loa e leoleo le faipule i le Aso Faraile, i moliaga o le fa'ao'olima ma le lafo o upu fa'amata'u.


O lea ua folasia foi e Loau, ua tapena e faaulu le tagi e faasaga i le 'aiga lenei ma o le 'ā mautinoa ai foi ni o latou moliaga.


O loo faaauau pea suesuega a leoleo e tusa o le mataupu i le mu o le fale, pe o iai ni gaioiga faasolitulafono o aafia ai.

91 views

Comentarios


bottom of page