top of page

Mōlia le nu'u o Afega i lona le usita'ia o Poloa'iga a le Fa'amasinoga Maualuga.

Ua fa'amaonia e le Matai o Afega ia Maulolo Tavita Amosa i luga o le polokalame a le E.T. LIVE i le Aso Toonai, o lea ua mōlia le latou nuu i le Fa'amasinoga ona o le fa'aauauina pea o latou galuega i Leauva'a.


O le mataupu i le va o Afega ma Leauva'a, na tagi ai alii ma faipule o Leauvaa i le Faamasinoga Sili a Samoa, ina ia tuuina atu se poloaiga lē tumau ia Afega e taofi ai galuega o le faamamāina o fanua i totonu o le nuu o Leauvaa.


O le vaiaso na te'a, na aumai ai se faaiuga a le Faamasino Sili ia Sātiu Simativa Perese, e poloa'iina ai Afega ia tāofi lē tumau galuega ae sei faasolo le suesuega o le Mataupu o loo tagi ai nei Leauvaa i le Faamasinoga.


O le Aso Faraile na te'a, na fofogaina ai le tagi a Leauvaa ona o le lē usitaia e Afega o le Poloaiga a le Faamasinoga.


Saunoa le Matai o Afega ia Maulolo, e tāmau pea le faaiuga a lona nuu ia amanaia lava le faaiuga na faia i le Faamasinoga o Fanua ma Suafa e tusa ai o fanua nei o Afega e i totonu o le nuu o Leauvaa.


O le finagalo o Maulolo, e le mafai lava e le Faamasinoga Sili ona fai se faaiuga faapenei ona e leo iai se latou malosiaga poo se pule'aga fa'aletulafono e mafai ai ona faia se faamasinoga poo se fa'aiuga i Mataupu tau i Fanua ma Suafa a le atunuu.


E ui ua taoto moliaga, ae e tūmau pea le tetee a Afega e tusa o lea faaiuga a le Faamasimoga Sili a Samoa.


O le Aso 16 o Me, o le 'ā suesueina ai le talosaga a Leauva i luma o le Faamasinoga Sili, i luma o afioga i le Faamasino Sili ia Satiu Simativa Perese, Niavā Mata Tuatagaloa ma le Faamasino Palagi mai i le Faamasinoga o Talosaga Tpe Iloilo poo le Court of Appeal.

4,011 views

Comments


bottom of page