Mae'a aso fiafia ae toe fa'aauau ai le usu masani i galuega.

By Lauano Demetrius Ah Mau.

O lea ua tuana’i vaiaso e lua na malolo ai le tele o tagata faigaluega a le malo i malologa masani i le fa’aiuga o lena tausaga fa’apea le amatlia ai o lenei tausaga fou.

O le vaiaso lenei lea ua toe a’e ai le tele o matagaluega ma ofisa le malo, ina ua mae’a le lua vaiaso sa malolo ai mai galuega masani o le tausaga ma feagai ai ma le Kerisimasi ma le tausaga fou.  

Ua tele foi ina toe taliu aiga ma uo sa tafafao ma fai aso fiafia mai i lo tatou atunu’u i le faaiuga o le tausaga ua mavae.

Sa maitauina e lau auaunaga le lolofi mai ai o aiga Samoa sa aumau i atunu’u mamao e asiasi mai, ae le gata i lea o fa’amoemoe o aiga i Samoa nei e pei ona iai le tele o fa’afotu tupu po’o saofa’i i suafa maualuluga ma suafa eseese i totonu o afioaga ta’itasi, o ni isi o aiga sa feagai ma fa’aipoipoiga, maliu fa’apea fa’aulufalega o malumalu tapua’i ma tele lava o fa’amoemoega o aso fiafia.  

O lea fo’i ua toe fo’i lava pisinisi o faleaiga ma so’o se auaunaga i taimi ua mae’a faa’atulagaina e tatala ma tapuni ai. Ua tapena ma sauni le tele o aiga i fuafuaga fa’ata’atitia mo lenei fo’i tausaga fou ua amata. 

O se taimi o le masina lenei o le ‘a toe ‘ae ai le fanau aoga i aoaoaga masani o le tausaga, o ni isi o fanau o le ‘a si’i i luga le vasega o le ‘a aoga ai a’o ni isi ua fa’atalitali i le aso e fa’a a’e ai kolisi maualuluga e pei ona iai fanau sa vasega 8 i le tausaga ua te’a.  

O fanau sa i lalo o le tausaga 13 lea o le ‘a sauni e a’otauinai i le iunivesite Aoao o Samoa i le Papaigalagala (NUS), fa’apea fo’i le iunivesite o le Pasefika i Alafua (USP CAMPUS).