21 Novema 2022
Ua taulimaina nei e leoleo se fa'alavelave na tula'i mai i luga o le va'a la'u pasese na malaga atu i Upolu e fa'amoemoe mo Salafai mai i le Aso Faraile na te'a nei.
Na talanoa mai se tasi o pa'aga fa'atuatuaina a le Blu Tv, o le fa'alavelave lenei na tula'i mai i le vaiaso na tuana'i nei i le malaga a le va'a la'upasese o le Samoa Express 2 e fa'amoemoe mo Savai'i, lea na iai se ali'i e fa'apea e ona, na aga'i atu lea ma moe i lalo o le loli lenei.
Ina ua latalata ina tuta le va'a i Salelologa, na sau ai lea ole supakako o le loli lenei ma fa'aola le loli ae o lo'o 'ai le kia; ma o lea na oso ai le loli ma solia ai le tama lenei ua maliu, ae o le taimi lena o lo'o i luga i potu o le va'a le ave loli e le'i sau i lalo.
I le talanoa mai a le tatou pa'aga, e fa'apea o le tama e le'i maliu i luga o le va'a;na logo le ta'avale mo fa'alavelave tutupu fa'afuase'i a le tineimu ma tili fa'anatinati atu ai i Tuasivi i le falema'i o Malietoa Tanumafili II.
O le po lava o le aso lea, Aso Faraile 19 Novema 2022 i le itula e 10pm i le po lea na uma ai lava lona soifua.
O lo'o fa'agasolo ai nei su'esuega a leoleo i lenei mata'upu.
E momoli atu fa'amaisega i aiga fa'anoanoa ma e pele ona o le toesea o le tama ma le 'aiga ona oni fa'alavelave tutupu fa'afuase'i.
Comments