Maliu se tamā matua ina ua feto'ai ta'avale.

Vāega na tupu ai le faalavelave i le tuā'oi o Falelima ma Siuvao.

O le taumafai o le atali'i e 'alo 'ese mai ma le vaega patupatu o le 'auala na avea ma tūlaga na feto'ai ai ma le isi foi taavale.

O le Aso Faraile 29 o Setema 2023, na tulai mai ai se faalavelave tau ta'avale afi i Falelima i le tuā'oi ma Si'uvao.

O le tamā ma lona atali'i na malaga mai i le Itū Asau e faamoemoe mo Salelologa, e fa'apea o le o'o atu i Si'uvao i le taufa'ai'ui'uga o Falelima i le vaega e iai se patupatu; na taumafai ai le atalii o le toeaina na aveina le taavale e ta ese i le isi itū 'auala ae ua fetaui ma le sau o le ta'avale a se tinā ma fetoai ai.

I molimau faatuatuaina, na faailoa mai e fai mata'utia o lea faalavelave ma o loo masalomia o le saoasaoa tele o le taavale a le tamā ma lona atali'i na mafua ai ona tūgā le lavea ma maimau ai le soifua o le tamā.

O loo ua i lima o leoleo lea matā'upu ia latou suesuega masani.