top of page

Manu Samoa 7's mo le ta'amilosaga i Singapore.



O lea ua fa’asalalau fa’alauaitele i luga o le api o foliga(Facebook) i le itulau a le Manu Samoa 7’s alo ma fanau ua tusi aao iai le susuga i le faiaoga ulu ia Muliagatele Fata Brian Lima ma le pulega ma filifilia o le a tauaveina Samoa mo le toe fa’aauauina o le ta’amilosaga ta’ito’a fitu a le lalolagi o le HSBC SEVENS i lona vae i Singapore i le amataga o le masina Me 2024.


O lo’o fa’ailoa mai fo’i i se fa’asilasilaga mai i le pulega a le ‘au ta’ito’a fitu a le atunu’u le mafuaga ua le filifilia ai nisi o ali’i ta’aalo talu ai o le to’a fitu o i latou o lo’o feagai ma manu’aga e aofia ai Paul Scanlan, Taunuu Niulevaea, Levi Milford, Neueli Leitufia, Motu Opetai, BJ Telefoni Lima ma Elisapeta Alofipo. O le ala lena ua le agava’a ai i latou i le filifiliina o le ‘au mo Singapore ma o lo’o iai le fa’amoemoe a le faiaoga ulu ma le pulega e iai le avanoa e filifilia ai i latou nei pe a maea mai le vae i Singapore ma ua fetaui ma le toe maua o le malosi mai o latou manua’aga o le tino.


Ua na’o le to’atasi lava le sui fou filifilia o le ‘au o lo’o masi’i nei mo Singapore e pei ona iai le susuga ia Enosa Afemai o lo’o filifilia mai a’o ta’alo i lalo o le kalapu lakapi a Tama Uli ma e sau mai i afioaga o Salelologa ma Sa’asa’ai, ae o le toatele lava o i latou o lo’o iai i le ‘au sui tuai ma sa ta’aalo i le tele o vae o le ta’ito’a fitu ua ma’ea.


O le Manu Samoa 7’s o lo’o fa’atulaga mai i le Pool B e aofia mai Farani, Aferika ma Spain, o le ta’aloga muamua a Samoa o le a ta’aalo ai ma Farani i le aso muamua o le ta’amilosaga o le aso Faraile aso 3 o le masina o Me i le itula e 8:20am i le taeao. E tolu aso o le a fa’agasolo ai le ta’amilosaga i Singapore amata mai i le aso 3 o Me ae fa’amaea i le aso 5.


O le ‘au a Niu Sila o lo’o umia le simaupini o le ta’amilosa lenei i Singapore mai i le tausaga e 2023 ua mavae atu.


Manu Samoa 7’s Team List.

  1. Vaovasa Afa Su’a(captain)

  2. Uaina Tui Sione

  3. Dan Patelesio

  4. Faafoi Falaniko

  5. Jeff Levy

  6. Malakesi Masefau

  7. Paul Eti Alesana-Slater

  8. Des Sepulona Faoa

  9. Tom Maiava

  10. Steve Onosai

  11. Pisi Leilua

  12. Tuna Tuitama

  13. Enosa Afemai*

  • Head Coach: Muliagatele Fata Brian Lima

  • Assistant Coach: Tausa Faamoe Faamaoni Lalomilo

  • Manager: Tuala Leaega Pat Leota

  • Video Analyst: Junior Narayan

  • Physiotherpist: Nathan Foulagi.


1,412 views

Yorumlar


bottom of page