Ua fa'ailoa mai nei e le fale lomi tupe o le De La Rue le maua ai e le Tupe Pepa $60 Samoa o le fa'ailoga o le "Tupe Fa'amanatu o le Tausaga 2023"i se fa'atasiga tele a le Security Printing Asia na faia i totonu o Sri Lanka.
O le tupe lenei na lolomiina fa'apitoa i le fa'amanatuina ai e Samoa o lona 60 tausaga i le 2022 ona o se tulaga mata'utia i le tala fa'asolopito o le atunu'u i lona tuto'atasi mai i Pulega Fa'akolone i le tausaga e 1962.
O le isi itu o le tupe pepa lenei $60 tala o lo'o lolomiina ai le ata o le tama'ita'i Palemia o Samoa ia Fiame Naomi Mata'afa, o ia lea o le uluai Palemia tama'itai o Samoa talu ona tuto'atasi mai.
O le isi itu o lo'o iai le ata o le Palemia muamua o Samoa ia Fiame Mata'afa Faumuina Mulinu'u II ms o ia fo'i o el tua'a o le ulua'i Palemia tama'ita'i o Samoa.
I lenei tupe pepa, o lo'o atagia ai se tama ma lona afafina sa o la'ua tau'aveina le tofi Palemia o le malo o Samoa.
O le tupe pepa $60 na tapenaina ma lolomi e le De La Rue mai i Peretania tele.
Ua fa'aali le agaga me'eme'e o le afioga i le Kovana o le Faletupe Tutotonu o Samoa ia Maiava Atalina Ainu'u- Enari ona o lenei fa'ailoga tauoloa ua maua e Samoa e tauala i lana tupe pepa $60 ma fa'afetaia ai le kamupani o le De La Rue ona o le faipa'aga ma Samoa i le lolomiina i tulaga pito sili ona lelei o tupe a Samoa.
O le maua ai e Samoa o lenei fa'aeaea maualuga i ana tupe, ua o se tulaga e molimauina ai galuega so'otaua'u fa'atasi a le faletupe tutotonu o Samoa ma le De La Rue i le mamanuina lea o tupe i se tulaga pito sili ona lelei.
Comments