N.U.S 40 TAUSAGA: Silia ma le 25 afe tagata Sāmoa na fa'au'u mai i le Iunivesitē Aoao o Samoa e na'o le $5 na fa'atū ai.

O le talafaasolopito lenei a le Iunivesite Aoao o Samoa e manatua pea, o le tausaga na faavae ai i le 1984 i le paleni e na'o le $5 sa iai.

O le asō ua aulia ai e le Iunivesitē talu ona faavae mai i le tausaga e 1984 ao tulai mai le afioga i le Tootooalii ua Tofilau Eti Alesana i le foe o le mālō i lena taimi.

O le aso Lua i le afiafi na tatalaina ai sauniga amata o le 40 tausaga o le Iunivesite, i le sauniga lotu na faia i le malumalu o le Ekalesia Katoliko i Lepea.

O le taeao nei o le Aso Lulu 14 o Fepuari, na faia ai le savali tele a tama ma teine o loo aotauina ma utuvai i le Papa i Galagala, na amata mai le savali i luma o le Ofisa o Tineimu i Apia ae tini mai i luma o le maota o Mālō i Matagialalua.

Na auai sui o le Iunivesitē, o le fa'a Ao le afioga i le Ao o le Mālō o Samoa, Tuimalealiifano Va'aleto'a Sualauvī II aemaise o Minisitā o le Kapeneta.

O le patipatia ai e le Iunivesitē o lona 40 tausaga, o se tasi o laupepa fou i le pulega aemaise o fanau ona pe 'ā fua iai lona faavae mai, e itiiti se seleni sa faatū ai ma le taimi nei ua lata i le 30 miliona le paketi ua faaagaga ma fuafuaina i paketi a le Iunivesitē i tausaga faaletupe taitasi.

O le afioga i le Minisitā o Aoga ma Aganuu ia Seuula Ioane Tuaau, na saunoa i le lauga autū, na toe fofola ai le fala i le amataga o lenei Iunivesitē.

O le 1984 na faavae ai mai i le paleni e $5, o tama ma teinei aova na amataina mai e nao le toa 45 faatasi ai ma faiaoga e i lalo ifo o le 30 i le polokalame faavae.

E oo mai i le tausaga lenei 2024, e silia ma le tolu afe alo ma fanau o loo aooga ma autova'a i le Papa i Galagala silia ma le 100 polokalame ma le silia i le 100 le aufaigaluega.

E tusa ma le 25, 642 i latou na faauu mai i le Iunivesite a Samoa, 41 pasene na faauu i le tausaga faavae, 34 pasene na faauuina faailoga maualuluga ma tikelī ma le 25 pasene sa faauu mai i Matātā'ese'ese.

O le vaiaso na te'a nei, na toe to'ia ai foi le Iunivesitē i se fesoasoani tele mai i le Mālō o Iapani e ala lea i le Faatunufugaga o le Faasaienisi ma le faisiaina o le fale mo aoga fa'afoma'i.