top of page

Nofo i Niu Sila le siampini o le ta'amilosaga ta polo a Malisi 2023.



O le vaiaso ua tuana'i na fa'atautaia ai se ta'amilosaga tapolo a le akalapu Malisi i Niu Sila, na auai ai Samoa ma Ausetalia.


O le ta'amilosaga na talimalo ai le kalapu tapoloa a le Marist Pro V New Zealang i le Formosa Golf Club i Aukilani.


Na fa'ailoa le agaga fa'afetai o le Peresetene o le kalapu tapolo a Niu Sila ia Tuala Ben Silva, ona o le lagolago malosi a Samoa ma Ausetalia i lea fa'amoemoe. O le talitonuga a le Peresetene, o taua nei ta'amilosaga fa'apenei e mafai ona fa'amalosia atili ai le galulue fa'atasi o le 'au tapolo a Malisi lava ia i so'o se vaega o le lalolagi aemaise o le atina'eina lea o nei ta'aloga i tupulaga aemaise ai lava o Samoa.


Na foa'i fo'i ma faimeaalofa le kalapu a Marist Pro V NZ i le 'au tapolo o le vaega laiti i Samoa e ala i mea ta'alo mo le ta'aloga.


E tusa ma le 16 sui ta'a'alo mai Samoa na auai i lenei ta'amilosaga, sa ta'ita'ia e le susuga ia Tu'u'u Amaramo Sialaoa. Sa ta'ua fo'i e Tuu'u, o se fa'amanuiaga le maua o nei avanoa taua ma ni isi o 'au ta'aalo mai Niu Sila ma Ausetalia.

O Ausetalia sa auai mai le 'auta'a'alo e 13 i lalo o le Kalapu o Marist Pro V Melbourne ma na ta'ita'ia mai e le Peresetene ia Tuala Paletesala Tevaga.


I le taualuga o le ta'amilosaga, ua toe nofo ai lava i Niu Sila le siamupini ina ua mae'a aso e lua.



O le aso lona tolu, sa fa'ataunu'uina ai le tauvaga e fa'aaogaina ai lanu o fale po'o 'au ta'alo i totonu o a'oga Malisi i Samoa. E fa(4) fale ma o latou lanu, o le Alfred(meamata), Dernand(samasama), Marcelling(blue) ma Dieter(mumu).


O le tausaga fou 2024, o le 'a talimalo ai Samoa i lea tauvaga mai le Aso 8 o Aukuso i le aso 10.


E iai le fa'amoemoe, ina ia vave ona tapena lea ta'amilosaga i le mae'a ai o le fa'amanatuina o le 100 o Malisi i le aso 29 o Iulai i le aso 4 o Aukuso 2024, ma ua silasila fo'i fa'atonu o le ta'amilosaga tapolo a Malisi i le vala'aulia o sui mai Amerika Samoa, ma isi setete.



144 views

Comments


bottom of page