"O Faatinoga Leotetele e toe Matimati ai le tatou Siosiomaga”.

O lenei vaiaso o loo faamanatuina ai le Vaiaso ole Siosiomaga mai le Aso 6 ile Aso 10 Novema, 2023 ile Sini Autu, “O Faatinoga Leotetele e toe Matimati ai le tatou Siosiomaga”. O lenei faamoemoe e faamanatu ai le taua o punaoa faalenatura ma faailo ai taumafaiga aemaise auala e uunaia ai le faaleleia ma le puipuiga ole ola faalenatura.

O le sauniga aloaia mo le tatalaina ole Vaiaso Faapitoa ole Siosiomaga na faataunuuina ile Malae o Aganuu ma Measina a le Matagaluega o Aoga ma Aganuu i Malifa. O le Afioga ile Minisita o Punaoa Faalenatura ma le Siosiomaga, Afioga Toeolesulusulu Cedric Pose Salesa Schuster sa saunoa ile autu ole aso ma tatala aloaia ai nisi o galuega a le Matagaluega ma faiga faapaaga e aofia ai:

• Faamama mo le Atunuu Atoa e aoina ai fagu uga, otaota e alu ile eletise ma otaota mamafa.

• Totoina o Laau - Totō sau laau i le asō mo se taeao lelei e avea o se vaega o le Polokalame ole 3 miliona Laau

• Ripoti o loo tuufaatasia ai le sao o Samoa ile faaitiitia o le kasa kaponi ile ea faapea polokalame faatino e tali atu ai i suiga ole tau;

• Ripoti o Galuega faatino a Samoa i lalo ole Maliega Faava-o-malo na sainia i Cartagena, Spain mo le puipuia ole ola faanatura;

• Fuafuaga mo le puipuia ole Fa'asao ma Togatogo i Puipaa

• Tuufaatasiga o Faatalatalanoaga faatino mo le mataituina lelei o Ogasami Faapitoa o Samoa (Vaega II)

• Laupapa mo le Faalauiloa ole toe totoina o laau

• Faalauiloa le Polokalame mo le Guardians Environment

• Sainia le Maliega ma le Iunivesite ale Monash, Faalapotopotoga o Saienitisi o Samoa (SROS) ma le Matagaluega o Punaoa Faalenatura ma le Siosiomaga.

O le a tatala aloaia polokalame o le Vaiaso i le Tauvaga mo le Sailia o se Manaia o le Ola Faalenatura, o se taumafaiga ina ia uunaia le silafia o le itupa o tama ile taua o latou sao ile faasaoina ma le puipuia ole siosiomaga. E ono afioaga o le a faatauva le taua o meaola ma laau ua lautogia mo lea faamoemoe:

• Tafatafa ma Matavai – Amu ma Aau

• Faleaseela – Manumea

• Fusi Saoluafata – Togo

• Magiagi – Pepe

• Matautu Lefaga - Laumei

O le 4 i le afiafi nei, o le a faatinoina ai se tauvaga pese ma solo, i le taua o le malosiaga faafouina mo se Samoa tumama, ma o loo tatala le avanoa i le mamalu lautele e auai ai i lenei polokalame.

O le tausaga fo’i lenei o le a faatino ai se fonotaga mo le faatauaina o le Siosiomaga, e tolu ni vaega o le a faaautu ai e aofia ai faalapotopotga eseese, vaega tumao’ti, ma polokalame fesosoani mo faalapotopotoga lautele, aoga maualuluga ma aoga faafaifeau i ona vaega eseese. O le a latou faasoa ni tomai ma agavaa aemaise fo’i o ni auala e poupou ma faaleleia ai faafitauli e tauala mai i ituaiga meaola ma iniseti eseese, o le faaleleia o le siosiomaga mama aua le mamalu o le atunuu, o otaota lafoa’i, ma malosiaga faafouina. O loo auai mai i lenei tausaga sui sinia mai Amerika Samoa aua faiga faapaaga faaauau i lalo ole faamalumaluga ole ATOA O SAMOA.

O le a faaiuina le polokalame o le Siosiomaga I le tufatufaina o faailoga tauoloa mo i latou ua tele so latou sao ile puipuia ma le faasaoina ole siosiomaga.