top of page

O le 'ā o'o i le Fa'amasinoga matā'upu o le fa'amavaega a 'Ale ma Tu'u'u.

Tesema 5, 2022.



Ua ma'ea nei ona tu'uina atu se tusi a le Fofoga Fetalai o le Maota ia Hon Papali'i Li'o Ta'eu Masipa'u i sui faipule o Faleata 4 ia 'Ale Vena 'Ale ma le faipule o Si'umu le Afioga ia Tu'u'u Anasi'i Leota e molia ai i la'ua e tusa ai ma le mata'upu i lo la'ua fa'amavae mai ai ma le vaega fa'a'upufai na o la'ua tauva ai i le Palota tele i le 2021.

O le masina o Novema 2022, le ana fofogaina ai fa'alaua'itele fa'amavaega a sui faipule nei to'alua mai i le vaega fa'aupufai e Puipuia Aia Tatau a Tagata(H.R.P.P).

O le Aso 8 o Novema 2022, na fofogaina ai aloa'ia 'e le Fofoga Fetalai e tauala mai i se tusi aloa'ia le fa'amaoniga o le fa'amavaega a sui usufono nei e to'alua mai i le Vaega Fa'aupufai(HRPP).

I lea fa'asalalauga aloa'ia a le Fofoga Fetalai na ia fa'ailoa ai, o le'a tu'uina atu ai lenei mata'upu i luma o le fono Aoao Faitulafono i lana fonotaga i le Aso 20 Tesema 2022 mo se fa'ai'uga talafeagai o lenei mata'upu.

O le molia ai la o le Faipule o Faleata 4 ma Si'umu o se faiga lenei o lo’o ta’oto ai aiaiga o le Fa'avae Maualuga a Samoa ma le Tulafono o Faigapalota 2019.

I le Fa'avae o Samoa lona Vaega 5; i le Mata'upu 47.

O lo'o fa'apea mai:

"47. Fa'ai'uga o Mata'upu e fa'atatau i le 'auai e avea o se sui usufono-O Mata'upu uma e ono laga e uiga i le aia tatau a so o se tagata ina ia avea pe tumau ai pea e avea o se Sui Usufono o le Palemene o le a tuuina atu lea i, ma fuafuaina tatau e le Faamasinoga Sili. "

O le vaega la lenei o le Fa'avae o le Malo Tuto'atasi o Samoa lea na fa'aaogaina e le Afioga i le Fofoga o le Fono i lana Fa'asalalauga i le Aso 8 o le Masina o Novema 2022.

I le tu'uina atu ai o le tusi i moliaga o sui faipule nei e to'alua' o lea ua fa'aaogaina ai le vaega o lo'o talanoa mai ai le Tulafono o Faigapalota 2019 e pei fo'i ona fa'atonuina e le Fa'avae o Samoa.

I le Tulafono o Faigapalota 2019, Vaega 16 i le Mata'upu 142; Fa'afuai'upu (1) - o lo'o fa'ailoa mai ai le tatau ai i le Fofoga Fetalai ona molia o ni sui usufono e tusa ai ma le Mata'upu 141 o le Tulafono o Faigapalota, lea o loo fa'apea mai ai; e avanoa le nofoa o se sui usufono pe ‘afai ua fa'amavae mai ma se vaega fa'aupufai i totonu o se paea'iga.

Ua iai nei la la le fa'amoemoe, o le 'a o'o atu lenei mata'upu i le Fa'amasinoga Sili aua se iloiloga fa’aletulafono ‘ina ua te’ena ai nei fo’i e faipule nei o la’ua moliaga e pei ona sa poloa’ia ai e le Fofoga Fetalai.


2,217 views

Comments


bottom of page