O le sa avea ma kapeteni o le Black Ferns (Le au Lakapi Tamaitai Niu Sila) ia Fiao’o Fa’amausili o le a faaulufaleina i totonu o le "Hall of Fame" (Vasega o tagata ua lauiloa) a le Lakapi a le Lalolagi i se sauniga faapitoa i le taamilosaga o le Ipu a le Lalolagi ia Novema.
I le taimi sa ta'alo ai Fiao'o, e fa'afa ona manumalo le Black Ferns i le siamupini i le Ipu a le Lalolagi i le Lakapi a Tamaitai, ma sa ia kapeteni i le Black Ferns i le va o le 2012 ma le 2018.
E silia i le 100 taaloga na ia taalo ai mo Aukilani ma manumalo ai i nisi o siamupini a le itumalo.
O Fiao'o Fa’amausili na fanau i Sāmoa, ma sa malaga atu ma lona aiga i Niu Sila ina ua lima ona tausaga. O lona tina e sau mai Fogapoa i Savai’i ae o lona tama e mai le afioaga o Faleula ma Aleisa i Apia.
O Fiao'o, e faigaluega i le ofisa o leoleo i Aukilani i saute. I le fa'ailoga o le aso fanau o le Tupu Tamaitai, le Masiofo ia Elisapeta 2 i le 2018, na tofia ai Fiao'o e avea ma Ofisa o le Fa'ailoga Taualoa a Niu Sila, mo le tautua i le lakapi.
Comments