Ua fa'ailoa e le Faletupe Tutotonu a Samoa ni suiga fou fa'aonaponei i tupe pepa $5,$10, ma le $20 i le fa'aliliuina mai le pepa tuai manifinifi i le pepa polemeta anagata.
O lo'o ta'ua i se pepa o fa'amatalaga a le Malo e fa'apea:
"O tupe pepa polemeta nei o le a tu’uina atu i le fa’ata’amilosaga o tupe i ni vaega ua fuafuaina.
O le a amatalia ona tu’uina atu e le Faletupe Tutotonu le tupe pepa polemeta $5 i le aso Gafua, 18 o Tesema 2023 ina ia tali atu i le mauāluga o le mo’omia o lea tupe i taimi o aso fiafia o le Kerisimasi. O le tupe pepa polemeta $10 ma le $20 ua fuafua e fa’amatu’u atu i le kuata muamua o le 2024.
O le a fa’ata’amilo fa’atasi lava tupe pepa $5, $10 ma le $20 o lo o i ai nei i le taimi e fa’agasolo ai suiga iā tatou tupe pepa fou polemeta anagatā".
O le tulaga anagata o le pepa polemeta, ua afua ai ona toe silasila lava le malo ina ia fa'aaogaina loa le pepa malo anagata lenei e lolomiina ai tupe pepa $5, $10 ma le $20.
"O le mauālalo o tatou tupe pepa e fua i le tulaga mātuiā o i ai le fa’aleagaina o le tupe, ma e tāua tele ai le toe fa’alautele atu o le tulaga malosi ma anagatā o tatou tupe pepa.
MAMANU FOU MA LE FAUSIAINA
O le fesuiā’iga a le Faletupe Tutotonu o ana tupe pepa i le pepa polemeta e mo’omia ai mamanu o lo o i ai nei e tatau ona tu’ulata mai ina ia fa’aāoga ai le tulaga lelei ma le anagatā o le pepa polemeta".
O le Kamupanī a le De La Rue i Egelani ua filifilia e faia le mamanu ma lolomi tupe pepa fou nei i le pepa e malu puipuia ma faigatā ona fa’aleagaina.
SI’ITIA O FOLIGA VA’AIA MALU PUIPUIA
E tāua ma mauāluga le tulaga malu puipuia po’o le saogālēmū, ma o le pepa polemeta e le gata ina tumau le saogālēmū, ae o lo’o tā’ui ai ma foliga va’aia o le puipuiga ma le ata manino o meatotino.
• E faigofie ona fa’alogoina le ‘ese’esega o le anagatā o le tupe pepa polemeta ma tupe pepa o i ai nei;
• Va’ai i le fa’amalama manino o lo o fa’ailoa ai le fugālā’au o le Teuila i luga o nei tupe pepa ta’itasi ma e faigatā tele ai ona faia ni tupe taufa’asesē;
• Siaki i le molī lanu violē, e va’ai ai le foliga o le GEMINI i ona lanu felanulanua’i i lanu e 2 fa’apea ai ma le numera o le tupe i se foliga poloka lanu meamata e tā’ua o le EMOEMO”;
• Auala fa’apitoa e lolomi ai le pito i luga ma ia ata lelei mai i le pepa polemeta e aumaia le tulaga maoa’e i mamanu o tatou tupe pepa ma ia mautinoa e pipi’i le vaitusi i le pito i luga;
O nei foliga va’aia ua tu’ufa’atasia e fa’alautele ai le puipuiga o tupe pepa fou nei.
MAFAI ONA ILOA
O tupe pepa fou nei e aofia ai foliga va’aia tumati’e o le polemeta i tupe ta’itasi, o lo o tau’aveina se mamanu fa’apitoa o patupatu togitogi e fesoasoani ai mo e po le va’ai. (O le $5 e 6 ona togitogi, $10 e 8 ona togitogi ma le $20 e 10 ona togitogi)
TALOSAGA MO LE TAUSIGA MA LE VA’AIGA
E tatalo atu le Faletupe Tutotonu o Samoa i tagatānu’u uma o le tatou atunu’u ina ia tausia lelei tupe pepa fou nei, e fa’amalosia ai le latou matāfaioi o se fa’ailoga o le mitamitaga o le tatou atunu’u ma le tatou fa’asinomaga.
E umi ona lelei pe a teu lelei i totonu o le atotupe ae ‘aua le gaugauina. E lē tatau ona fa’aleagaina pe saesae nini’i, gaugau, tu’uina i le vevela, ma e lē tatau fo’i ona fa’amau i vni pine fa’amau pepa (staple).
O nei gaioina e faigofie ai ona masae le tupe. O le aputiputi lelei ma le tausia lelei o le a mautinoa ai le umi ona lelei ma āoga nei tupe pepa fou.
Ona o lea e sauni atu le Faletupe Tutotonu e fa’alauiloa aloā’ia nei tupe pepa fou polemeta, e toe fa’ailoa atu ai le agaga naunauta’i o le Faletupe Tutotonu ina ia tu’uina atu tupe pepa sili ona lelei, anagatā ma malu puipuia, e le gata ia ausia ai tulaga aloā’ia fa’avāomālō ae o le a fai ma ata va’aia o le agaga Samoa moni fa’apea tu ma aga tausili a Samoa.
Comments