top of page

"O lea ua matou omai ma 'Ale e molimoli atu e lagolago i le vaega faaupufai(F.A.S.T)". Faleata 4.

Ua māe'a ona momoli aloa'ia le sui filifilia a le Itūmālō o Faleata Numera 4, le tōfā i le igoa matua ia 'Ale Vena 'Ale i le vaega fa'aupufai o le Fa'atuatua i le Atua Samoa ua tasi ina ua māe'a le faigāfilifiliga a le itūmālō i le masina o Setema.


O le taeao o le Aso To'ona'i 14 Oketopa 2023, na aga'i ai le Itūmālō e momoli atu le latou faipule i 'a'ao o le Vaega Faaupufai ale F.A.S.T i le Maota o Samoa i Vaitele.


O le afioga i le alii faipule sa fa'amavae mai ma le vaega faaupufai a le H.R.P.P i le tausaga 2022 i le masina o Novema, ina ua manatu e leo toe iai sona talitonuga i lea pātī faaupufai.


I le māe'a ai ona fa'amavae, na toe tagi ai le vaega faaupufai a le H.R.P.P ona e manatu ua tatau ona toe fo'i e fai lana faigāpalota laitiiti, mulimuli ane ua molia ai e le Fofoga Fetalai ma tuuina atu ai i le Faamasinoga ae peita'i sa toe soalaupule ma ave i tua le matā'upu ina ua malilie e toe fai le faigāpalota lāiti ma isi o itūmālō e tolu e aofia ai Siumu ma Vaa o Fonotī.


O le aso 15 o le masina o Setema na toe fai ai le faigāpalota, ma o le i'uga o le faigāfilifiliga na manumālō ai le tōfā le igoa matua i palota e 953 i le 488 o palota na maua e le tōfā ia Ulu Bismark Crawley.

I le saunoaga a le sui o le itūmālō, ua latou lagolagoina atoa le auai o le tōfā ia Ale Vena Ale e galue ma tautua i lalo o le faamalu a le vaega faaupufai o le Faatuatua i le Atua Samoa ua Tasi.


Sa tali fuaitau le afioga i le tama'ita'i Palemia ia Fiame Naomi Mata'afa, i le tāua o le nofoa lenei mo Faleata 4 ona ua atoa iai le 35 o nofoa mo le vaega faaupufai i le palemene e ausia ai le lua o vaetolu.


E tolu nuu i totonu o Faleata 4, e aofia ai Saina, Toamua ma Puipa'a.

924 views

Commentaires


bottom of page