Ofo soifua o ni talavou mai i le Ekalesia Iesu Keriso O Le Au Paia O Aso E Gata ai mai Utah e tautua mo le SVSG.

E le o tuua lava le agalelei faifai pea a le Ekalesia Iesu Keriso O Le Au Paia O Aso E Gata ai mo le malo o Samoa e le gata i mealofa ma agalelei e faimealofa mai ai tauala mai i Matagaluega ma fa'alapotopotoga a'o soifua o alo ma fanau e ofoina mai e tautua e aunoa ma se totogi e pei ona iai alo talavou o lo'o galulue nei i le fausiaina o se falema'i i totonu o le lotoa a le To'omaga mo e puapuagatia.

O alo ma fanau nei mai i Utah i Amerika sa malaga mamao mai lava ona o le fia tautua ma ofoina le soifua e galulue ai mo le Samoa Victim Support e aunoa ma se taui e totogi ai o le toatele o i latou e i lalo o le 16 i le 18 tausaga le matutua ma e tele lo latou talitonuga i le mau tauave a le Fa'ala[poopotoga mo e puapuagatia o le aputiina ma le puipuia o soifua o alo ma fanau o Samoa mai sauaga mataga ma le fa'atauaina le ola.

O le maota fou po'o le fale fou o lo'o fausiaina nei o lo'o fa'amoemoe mo le siakiina o alo ma fanau o lo'o i totonu o lotoa ina ia mautinoa o lo'o atoa le malosi o le tino ma o lo'o soifua maloloina ma sefe mai i fa'ama'i ma ua patino lava lea fale mo alo ma fanau o lo'o i le fa'alapotopotoga mo e puapuagatia ma o se fa'amoemoe ua leva ona mo'omo'o iai le fa'alapotopotoga.

O lo'o iai le fa'amoemoega o le a toe malaga atu lenei aumalaga i le aso Lulu o le vaiaso fou ma o le a toe taliu ma omai ai leisi kulupu o le polokalame lava lenei e fa'aauauina le galuega ina ia maea i le isi 7 vaiaso o lumana'i nei.