26 Setema 2022.
PC: Facebook
E le'i talia gofie 'e tagata lagolago ma e pele i loto le ali'i fusu o Joseph Parker se va'aiga na iai le fa'aiuga o le fusu'aga a le alo Samoa o Joseph Parker ina ua malolo i le tu'ioti i le la fusuaga ma le ali'i Peretania o Joe Joyce i le Aso 24 o Setema 2022 i le maea fusu i Manchester AO Arena.
O se taimi muamua lenei ua faiaina ai Joseph Parker i le tu'ioti talu ona fusu o ia i fusuaaga fa'apolofesa, i le 33 o ana fusuaga fa'apolofesa ua fa'apena ona fa'atoilalo ai e le tama fusu Peretania o Joyce i le ta'amilosaga lona 11.
I matamata atu i lenei iloiloga i totonu o le maea i alii fusu e to'alua i le fa'ai'uga o le vaiaso, o sina taimi pu'upu'u na maua ai sina koma o la'ua lima i le taamilosaga 11, o ina na maua ai ma le avanoa e fa'amautu lelei ai le tu a le alii o Joyce ma toe fa'afouina mai ai lona malosi mo se taimi pu'upu'u. Na toe fusu mai Joyce i lea lava taimi ma tau'ai mai ona lima i le puimanava o Parker ma fa'asolo ane i luga ma maua tonu ai le 'auvae o Joseph, o le malosi tele o le tu'i masau na maua ai le auvae o le alii Samoa na faigata ai ona ia fa'atoilalo le faitauga 'a le laufali.
I le mae'a o le fusuaga na maua le avanoa e feiloa'i atu ai i le au tusitala ma sa talanoa malosi mai le susuga ia Joseph Parker i lona naunauta'iga e fa'aauau pea lana taleni.
"O lea oute lagona e tele ni vaega e fa'aleleia, e tatau ona ou galue malosi ma fa'alogo" ta'ua e Parker ile 'au tusitala.
"Oute le fa'avaivai ai 'i'i, e leai fo'i mea oute toe mafaufau ai i le fusuaga ua uma, o le faia'ina lava ole faia'ina. Ua na'o se ta'aloga, o le'a ou toe fo'i pea e toleni ma fai se isi galuega, aua a 'ou mafaufau iai o le'a faigata ai lava ona ou aga'i i luma ma ou tumau ai pea i tua" se tasi o saunoaga a le alii fusu Samoa o Joseph Parker.
E lototele lava le alo Samoa e toe fusu 'ae le'i mae'a lenei tausaga, ma na ia ta'ua o ai lava e togi atu le lu'i o le'a ia fusu lava.
Commentaires