top of page

Pa'ū le tau o suāu’u mo le masina o Fepuari 2024.


Tusia: Lauano Demetrius Ah Mau


I se pepa o fa’amatalaga mai i le Matagaluega o Tupe, ua fa’ailoa manino mai ai le fa’aititia o tau o oloa tau suāu’u mo le masina o Fepuari o le Tausaga lenei 2024.

Ua talafeauga lelei lenei fa’amāmā avega ma le toe a’e ai o aoga a le fanau aemaise o se tala fiafia mo tagata faigaluega faapea le mamalu lautele o le atunu’u i tulaga o le tau fa’asoasoaina o seleni aua o fa’amoemoega lava nei o le tele o aiga o ta’avale, e femalaga a’I I totonu lava o Samoa.

O le masina o Ianuari ua mavae sa maualuga ai le tau o suāu’u, tusa ai male saunoaga a le Afioga I le Minisita o Tupe le Afioga ia Lautimuia Afoa Uelese Vaai na ia saunoa e fa’apea;

“I le ava tele, ou te fa’alauiloa aloā’ia atu ai tau fou o le suāu'u, e afua atu i le Aso 1 o Fepuari 2024.

“Ua fa'amauina le pa’ū uma o tau o oloa tau suāu’u, o le Penisini o le a pa’ū i le 2.7 sene i le lita mai le $3.15 i le $3.12 i le lita.

“O le Tiso o le a pa’ū i le 6 sene i le lita mai le $3.38 i le $3.32 i le lita ma le Karasini o le a fa’aitiitia i le 2.4 sene i le lita mai le $3.00 i le $2.98 i le lita.

“O tau o le suāu’u mo le masina o Fepuari, o lo’o faatulagaina mai i le tau o le suauu i Sigapoa i le masina o Tesema 2023.

“O lo’o fa’aauau ona pa’ū tau o suāu’u e le’i fa’amamāina ma suāu’u ua fa’amamāina i le masina o Tesema e ui i le fa’aitiitia o suāu’u gaosia e atunu’u o lo’o i lalo o le Fa’alapotopotoga o atunu’u o lo’o gaosia ma tufatufaina le Suāu’u (O.P.E.C. +), aemaise o popolega i a’afiaga o le tāua o lo’o faia i le va o Hamas ma Isaraelu.

“Sa osofa’ia fo’i e fitafita o Houthi le vaa suāu’u i le sami ulaula (red sea) ma avea ma mafua’aga ua si’itia ai le tau o le fela’uā’iga o le suāu’u i luga o le vasa (freight).”


84 views

Comments


bottom of page