Pine Apa memea le alii saoasaoa a Samoa i lana ulua'i taaloga o le Pasefika.

O le uluai taimi a le alii talavou o Johnny Key i taaloga o le Pasefika, e pei ona tauvā ai i taaloga tamo'e o le 100 mita; ae na tūmatila ana taumafaiga i taaloga a le Pasefika o loo talimālō ai Solomona i lenei tausaga 2023.

O Johnny Key ua 20 tausaga le matua o lona soifua, ma i ana taumafaiga i le aso muamua na saofagā ai i le sailiga siamupini ma ia mauaina ai le pine apamemea mo le atunuu ae ave uma e Ausetalia le Pine Auro ma le Siliva i lea tuuga fa'ai'u.

O Key, sa avea ma alii saoasaoa o le taaloga tamoe i taaloga a aoga i le 2021 ao aoga ai i le Kolisi o Sagato Iosefo i le tamoega o le 100 mita ma le 200 mita.

I le faatalanoaga i luga o le itūlau a le S.A.S.N.O.C., sa ia momoli lona agaga faagaeetia ona o le tulaga maualuga ua ia la'asia ma sa ia faafetai ai le Atua ona o le malosi ua ae manuia ai ana taumafaiga.

O le susuga ia Johnny Key e aga'i mai i nuu o Vaitoloa , Vaitele ma Apia.

O le taimi nei, o loo tulaga 4 Samoa i faatulagana o Pine talu ona amata mai taaloga a le Pasefika, o New Caledonia o loo tulaga muamua e 159, tulaga lua Ausetalia e 70, tulaga tolu Tahiti e 124 tuufaatasiga o pine ae o Samoa i le tulaga fa, e 31 pine auro, 16 siliva ma le 15 o pine apamemea ona maua lea o le aofa'i e 62.